Almaty taýlaryndaǵy qurylys: Senator jer berýge moratorıı jarııalaýdy surady
«Qoǵam belsendileri, ekologtar, seısmolog mamandar, zańgerler jáne qala turǵyndary kúrdeli máselege nazar aýdarýdy talap etip otyr. Qorshaǵan ortaǵa zalal keltirilip jatyr. Osynyń saldary turǵyndardyń ómirine eleýli qaýip tóndiredi», - dedi Andreı Lýkın Premer-Mınıstr men Bas prokýrordyń atyna joldaǵan depýtattyq saýalynda.
Onyń aıtýynsha, keıingi onjyldyqta taý jáne taý eteginiń bóliginde qarqyndy qurylys júrip jatyr.
«Jeke qurylys kompanııalary kásipkerlikti tekserýge moratorıı jarııalanýyn jamylyp, jer telimderiniń nysanaly maqsatyn sharýa qojalyǵy nemese baý-baqsha sharýashylyǵynan jeke turǵyn úı qurylysyna aýystyryp, keıin taý etegine jaqyn jerlerde kópqabatty turǵyn úı keshenderin salyp jatyr. Tótenshe jaǵdaılar mınıstrligi bul aýmaqtardaǵy qurylystar tehnogendik sıpattaǵy jer qabatynyń kóshkinine ákelýi múmkin ekenin birneshe ret málimdedi. Óıtkeni mundaı aýmaqtar kúrdeli qurylysqa jaramaıdy», - dedi senator.
Osy oraıda ol atalǵan jerlerdi rásimdeýge qatysty túrli jarnamalar da jarııalanyp jatqanyn aıtty.
Andreı Lýkın Úkimetke Almaty qalasynyń taýly jáne Almaty oblysynyń Almatyǵa jaqyn aýdandarynyń jerlerine egjeı-tegjeıli túgendeý júrgizýdi usyndy.
Onyń paıymynsha, qoldanystaǵy zańnamaǵa atalǵan jerlerde jeke qurylys salýǵa tolyq tyıym salýdy eskeretin ózgerister engizý kerek. Budan bólek, tıisti normatıvtik-quqyqtyq aktini qabyldaǵanǵa deıin jer telimin bólýge moratorıı jarııalaý qajet.
Budan buryn habarlanǵandaı, byltyr Almatyda Medeý aýdanynyń turǵyndary qala ákimimen kezdesý barysynda taý baýraıynda úı qurylysy qarqyndy júrip, alma baqtary kesilip jatqanyn aıtty.
