Almaty taýlarynda joǵalyp ketken úsh týrıst tabyldy
ALMATY. QazAqparat - Almatyda Respýblıkalyq jedel qutqarý jasaǵynyń qyzmetkerleri taýda adasyp ketken úsh týrısti qutqardy, dep habarlaıdy QazAqparat tilshisi.
28 tamyz kúni respýblıkalyq jedel-qutqarý jasaǵynyń kezekshi bólimine, Úlken Almaty shyńyna barar jolda adasyp ketken úsh jas týrıst týraly habarlama kelip tústi.
«Oqıǵa ornyna respýblıkalyq jedel-qutqarý jasaǵynyń jedel toby shyqty. Týrıster qutqarýshylarǵa qaı jerde ekenderin túsindire almady. Jasaq qyzmetkerleri jergilikti jerdi jaqsy biletindikteriniń arqasynda, jigitterdiń shamamen ornalasqan jeri – Prohodnoe shatqaly men Aıýsaı shatqalynyń arasy dep paıymdady»,- dep habarlady respýblıkalyq jedel-qutqarý jasaǵynyń baspasóz qyzmeti
Qarańǵy túskendikten kez kelgen shatqal arqyly kóterilý múmkin emes, daýyldyń saldarynan relef tik jáne adam aıaǵy basqysyz boldy.
Jedel top jetekshisi zardap shekkenderge Úlken Almaty shyńy (teńiz deńgeıinen 3600 metr bıiktikte) arqyly jetýge sheshim qabyldady.
«29 tamyz túngi saǵat 02.30-da jedel top týrısterdi tapty. Jastardyń muzdap qalǵandary bolmasa, jalpy jaǵdaılary jaqsy boldy. Zardap shekkenderge sý jáne jyly kıimder usynǵan RJQJ qutqarýshylary, jigitterdi túsirýge kiristi. Ol úshin eki shatqaldy bóletin jotaǵa shyǵý kerek boldy. Týrısterdiń fızıkalyq daıyndyǵynyń bolmaýyna jáne tas qulaý qaýpine baılanysty, qutqarýshylar óte baıaý jáne asqan qyraǵylyqpen qozǵaldy»,- delingen habarlamada.
Qutqarýshylar týrısterdi tómenge túski saǵat 11.15-te túsirip, týystaryna tapsyrdy.
