Almaty taýlarynda joǵalyp ketken týrıstiń denesi tabyldy
ALMATY. QazAqparat - Almaty taýlarynda joǵalyp ketken týrıstiń denesi tabyldy, dep habarlaıdy QazAqparat tilshisi.
Bul aqparatty QR Tótenshe jaǵdaılar mınıstrliginiń resmı ókili Talǵat Ýálı rastady.
«12 aqpan kúni saǵat 14: 30-da 1981 jyly týǵan er adamnyń denesi «Shymbulaq» shatqalynan tabyldy» dep habarlady QR Tótenshe jaǵdaılar mınıstrliginiń resmı ókili Talǵat Ýálı.
Birinshi kúnnen bastap izdestirý jumystary qalyń tuman, qatty jel, dymqyl qar, nóldik kóriný jaǵdaıyna qaramastan júzege asyryldy. Qutqarý jumysy 3200 m astam bıiktikte, kóshkin qaýpi joǵary aýmaqta júrgizildi.
Jedel-qutqarý toptary Shymbulaq shyńyn, janasyp jatqan jotany, Shymbulaq ózeni boıyndaǵy shatqaldy, sondaı-aq Bogdanovıch muzdyǵynyń aýdanyn jáne Talǵar asýyn tolyqtaı qarap shyqty.
Kesheli beri qutqarý operatsııasy aýa raıynyń nasharlyǵyna baılanysty jaıaý júrgizildi.
Sondaı-aq «Qazavıaqutqarý» mekemesiniń KA-32 áýe borty da izdeý jumysyna ázirlendi. Alaıda qolaısyz meteorologııalyq jaǵdaıǵa baılanysty tikushaq áýege kóterilmedi.
Іzdeý jumystaryna Tótenshe jaǵdaılar jáne dúleı zilzalalardyń qaýip-qaterin azaıtý jónindegi halyqaralyq ortalyqtyń ushqyshsyz basqarý apparaty (dron) qoldanyldy.
Dron teńiz deńgeıinen 5 myń 300 metrden astam bıiktikke 5 márte kóterilgen. Kezekti izdestrý barysynda dron adamnyń qulaǵan izin kórsetti.
Osy arqyly qutqarýshylar joǵalǵan adamnyń boljamdy izdestirý aýmaǵyn belgilegen. Keıin alpınıstik jabdyqtar men jipterdi qoldana otyryp, qutqarýshylar shatqalǵa tústi.
Kóshkin qaýpine qaramastan, qazirgi ýaqytta zardap shegýshini tasymaldaý jumystary júrgizilýde. Máıitti tasymaldaý shamamen 3 saǵattan astam ýaqytty alýy múmkin.
Esterińizge sala keteıik, izdestirý-qutqarý jumysyn úılestirý úshin oqıǵa ornynda TJM aýmaqtyq bólimsheleriniń, «109 qutqarý qyzmeti», Apattar medıtsınasy ortalyǵynyń qutqarýshylarynan Almaty qalasy TJD jedel shtaby quryldy. TJ jáne dúleı zilzalalardyń qaýpin azaıtý ortalyǵynyń ónerkásiptik ushqyshsyz ushý apparaty qoldanyldy.
Osylaısha qutqarý operatsııasyna 70 qutqarýshy, 12 tehnıka jumyldyryldy.
Osyǵan deıin Almaty qalasy TJD qala turǵyndaryn qar kóshkini qaýpi jaıynda birneshe ret eskertken bolatyn.
Eske sala keteıik, biz buǵan deıin Almatyda taýda er adamnyń joǵalyp ketkenin habarlaǵan bolatynbyz.
