Almaty taýlarynda jaraqat alǵan týrıst qutqaryldy
ALMATY. QazAqparat – Almaty taýlarynda jaraqat alǵan týrıstke qalalyq qutqarý qyzmetiniń qutqarýshylary kómektesti, dep habarlaıdy QazAqparat tilshisi.
8 aqpan kúni saǵat 18.05-te Almaty qalalyq qutqarý qyzmetiniń «109» nómirine zardap shekken adamǵa kómek qajettigi týraly týrısterden qońyraý túsken.
Anyqtalǵandaı, týrıster Qımasar shatqalynan tómen túsip kele jatqanda 20 jastaǵy jigit aıaǵyn qaıyryp alyp, ózdiginen qozǵala almaı qalǵan. Oqıǵa ornyna 4 adamnan turatyn qutqarý tobynyń ekıpajy shyqty.
Shatqalǵa jetken qutqarýshylar Qımasar asýyna teńiz deńgeıinen 2200 metr bıiktikke kóterildi.
«Qutqarýshylar toby týrısterdi taýyp, zardap shekken adamǵa alǵashqy medıtsınalyq kómek kórsetti. Sodan keıin olar týrısti tómen alyp tústi. Aıaǵynan jaraqatap alǵan jas jigit qutqarý qyzmetiniń jedel kóligimen №12 klınıkalyq emhanaǵa jetkizilip, medıtsınalyq qyzmetkerlerge tapsyryldy», - dep habarlady qalalyq qutqarý qyzmetinen.
Óz kezeginde zardap shekken adam qutqarýshylarǵa rızashylyqtaryn bildirdi.
