Almaty taýlarynda jaraqat alǵan er adam qutqaryldy
ASTANA. QazAqparat - Úlken Almaty shyńynda qoly synyp, basy jaralanǵan er adam qutqaryldy, dep habarlaıdy QazAqparat QR ІІM Tótenshe jaǵdaılar komıtetine silteme jasap.
«30 maýsym kúni 14 saǵat 14 mınýtta Respýblıkalyq jedel-qutqarý jasaǵynyń kezekshi dıspetcherlik bólimine Almaty qalasynyń TJ departamentinen habarlama kelip tústi. Onda Úlken Almaty shyńynda 1987 jyly týǵan er adamnyń qoly synyp, basy jaralanǵany aıtyldy. Ózdiginen qozǵala almaǵandyqtan, joldastary bir adamdy qasynda qaldyryp, taýdan túsip ketken», - dep habarlady QR ІІM TJK resmı ókili Rýslan Imanqulov.
Oqıǵa ornyna Respýblıkalyq jedel-qutqarý jasaǵynyń jedel toby attanǵan. Bir jarym saǵattyń ishinde qutqarýshylar kosmoortalyqqa jetip, shyńǵa shyǵýdy bastady. 16:15-te jaralanǵan saıahatshy tabylyp, oǵan alǵashqy járdem kórsetilgen. Taǵy bir saǵattan keıin er adam Alma-Arasandaǵy jedel járdem brıgadasyna jetkizildi.
«Respýblıkalyq jedel-qutqarý jasaǵynyń qutqarýshylary taýǵa shyǵarda jaqyndaryńyz ben týystaryńyzǵa taý baǵyty men keler ýaqytty habarlaý qajettigin eskertedi. Yńǵaıly aıaq kıim kıip, taýdaǵy temperatýralyq rejimniń ózgeretinin (árbir 100 metr saıyn bir gradýsqa tómendeıdi) eskergen jón», - delingen habarlamada.
