Almaty taýlarynda ystyq tamaq pisirýge 14 oryn qarastyrylǵan
ALMATY. QazAqparat – Іle-Alataý ulttyq parkinde ystyq tamaq daıyndaý úshin arnaıy jabdyqtalǵan 14 oryn bar. Bul týraly óńirlik kommýnıkatsııalar qyzmetinde Almaty qalalyq tótenshe jaǵdaılar departamentiniń memlekettik órt baqylaý basqarmasynyń basshysy Danııar Júsipov aıtty, dep habarlaıdy QazAqparat tilshisi.
Spıkerdiń málimetinshe, atalǵan 14 orynnyń 12-si - Alma-Arasan shatqaly aýmaǵynda, 2-ýi Úlken Almaty men Kazachka ózenderi boıynda jáne Býtakovkada ornalasqan. Ol jerlerde ústel-oryndyqtar, ot jaǵýǵa arnalǵan alańqaılar men mangaldar qarastyrylǵan. Sonymen birge, erekshe qorǵalatyn tabıǵı aımaqtardyń aýmaǵynda jáne belgilenbegen jerde ot jaqqany úshin Orman sharýashylyǵy mekemeleriniń qyzmetkerleri «Ákimshilik quqyq buzýshylyq týraly» QR Kodeksiniń 367-baby boıynsha ákimshilik aıyppul salýǵa ýákilettik baryn atap ótti. Jeke tulǵalarǵa 10-nan 100 AEK-ke deıin aıyppul salynýy múmkin.
«Іle Alataýy memlekettik ulttyq tabıǵı parki» RMM ormandy qalpyna keltirý jáne jańǵyrtý bóliminiń basshysy Raıhan Muhametjanova ótken jyly ulttyq park aýmaǵynda jalpy aýdany 19,5 ga bolatyn 10 orman órti bolǵanyn aıtty.
«Onyń 10,5 gektary ormandy jerler. Órtten kelgen zalaldyń jalpy somasy 418 900 teńgeni qurady», - dedi ol.
Danııar Júsipov qala turǵyndary men qonaqtaryna taýly-ormandy jerlerde órt qaýipsizdiginiń qarapaıym erejelerin saqtaý qajettigin eske saldy.
«Demalys oryndarynda órt týdyrýy múmkin qoqysty qaldyrmaı, olardy ózińizden soń jınap ketý kerek, tutanǵan sirińkelerdi, temeki tuqyldaryn eshqaıda tastamańyzdar, qurǵaq shópti jaqpaý qajet, ot jaǵýǵa jol bermeńiz, arnaıy bólinbegen jerde mangal men basqa da pisirý quraldaryn paıdalanbaý kerek», - dedi ol.
