Almaty taýlarynda tórt jasóspirim joǵalyp ketti
ALMATY. QazAqparat - Almaty taýlaryna saıahatqa shyqqan tórt jasóspirim joǵalyp ketken. Saıahat kezinde bir qyzdyń jaǵdaıy nasharlap, balalar óz betimen qalaǵa orala almaǵan.
QR ІІM TJ Komıteti baspasóz qyzmetiniń habarlaýynsha, 26 shilde kúni 17 jastaǵy tórt jasóspirim Medeý sport keshenine ketip, taýlar arasynda joǵalyp ketken.
«16:05-te respýblıkalyq jedel-qutqarý jasaǵynyń kezekshi dıspetcherlik bólimine joǵalǵan qyzdyń ájesinen habarlama kelip túsedi. Onyń nemeresi dostarymen birge Medeýge ketken, balalardyń birinshi qateligi - eshkimge eskertpeı júrý baǵyttaryn ózgertýi boldy», - dep habarlady mekeme.
Jas týrıster Kókjaılaý aýmaǵyna bet alǵan, biraq qyzdardyń birine kún ótip, jaǵdaıy nasharlaǵan. Balalardyń ekinshi qateligi - qaýipsizdik erejelerin saqtamaýy.
«Qyzdyń aýyr jaǵdaıynan balalar taý etegine túse almaǵan, qutqarýshylarǵa da qaı jaqtan taýǵa kóterilgenin aıta almaı, adasyp ketkenderin moıyndady», - deıdi TJ komıteti qyzmetkerleri.
16:10-da QR ІІM TJK Respýblıkalyq jedel-qutqarý jasaǵy qutqarý bólimshesiniń komandıri Baýyrjan Arystanbaevtyń basshylyǵymen balalardy izdeýge attandy.
17:10-da balalar tabyldy. Qutqarýshylar balalardy taýdan túsirip, qalaǵa ákelip, jedel medıtsınalyq kómek brıgadasyna tabystady.
Taý arasynda bastan kún ótip ketpeý úshin mindetti túrde bas kıim kııý kerek jáne suıyqtyqty kóp ishý kerek. Spırtti ishimdikterden bas tartqan jón. Eger álsizdik, bas aınalýdy sezseńiz, júregińiz jıi soqsa, kóleńkege baryp, jedel járdem qyzmetin shaqyrý kerek», - dep atap ótti TJ Komıteti.
