Almaty taýlarynda tórt týrıst qutqaryldy
ALMATY. QazAqparat – Almatyǵa jaqyn mańdaǵy Batareıka ózeniniń shatqalynda qalyp qoıǵan tórt týrıst qutqaryldy, dep habarlaıdy QazAqparat tilshisi.
QR ІІM Tótenshe jaǵdaılar komıtetiniń baspasóz qyzmetinen málim etkendeı, 29 mamyr kúni joǵalǵan týrıster týraly aqparatty Kókjaılaýǵa bara jatqan er adam jetkizgen. Onyń aıtýynsha, Mohnatka taýynyń sol jaq betkeıinde eki adam ózderine nazar aýdartyp, qıyn jaǵdaıǵa tap bolǵandary týraly belgi bergen.
Respýblıkalyq jedel qutqarý jasaǵynyń jedel toby ıisshil ıt ertip, joǵalǵandardy izdeýge attandy. Qutqarýshylardyń kásibı sheberliginiń arqasynda zardap shekkender tez tabyldy.
«Belgili bolǵandaı, eki er adam Batareıka ózeniniń boıymen sarqyramaǵa bet alǵan. Alaıda, osy ózenniń shatqalynda 2011 jyly bolǵan qatty daýyldyń saldary áli de saqtalǵan. Qulaǵan aǵashtar týrısterdiń dittegen jerge jetýine kedergi keltirgen. Qaýipti jolda jigitterdiń biri aıaǵyn jaraqattap alǵan. Ol óz betimen qozǵala almady. Jandarynan ótip bara jatqan qyz ben jigit kómekke kelip, qutqarýshylardy birge kútýge bel býǵan»,– delingen habarlamada.
Qutqarýshylar eń aldymen, aıaǵy jaralanǵan jigitke alǵashqy medıtsınalyq kómek kórsetip, ony tómende kútip túrǵan medıtsına mamandaryna tapsyrdy. Qalǵan týrıster de qaýipsiz jol arqyly tómenge túsirildi.
