Almaty taýlarynda shańǵyshylar qar kóshkinine sebep boldy
ALMATY. QazAqparat- Kishi Almaty ózeni basseıninde shańǵyshylar qar kóshkininiń júrýine sebep boldy. Bul týraly qalalyq Tótenshe jaǵdaılar departamenti málim etti, dep habarlaıdy QazAqparat tilshisi.
«23 qańtarda Qazseldenqorǵaý mamandary Kishi Almaty ózeni alabyn zertteý barysynda №21 «Sarqyramada» shańǵyshylardyń syrǵanyǵanyn anyqtady. Olar qar kóshkinin týdyrǵan. Jalpy massasy 500 tekshe metr qar taý betkeıinde toqtaǵan. Qaza bolǵandar, zardap shekkender joq»,- dep habarlady vedomstvodan.
Osyǵan baılanysty «Qazseldenqorǵaý» men Almaty qalasynyń Tótenshe jaǵdaılar departamentiniń mamandary shańǵy jáne snoýbordpen syrǵanaýdy unatatyndarǵa shańǵy kýrorttary men bazalardaǵy arnaıy bólingen jerlerde syrǵanaýǵa keńes berdi.
Jyl basynan beri taýlardyń jabyq ýchaskelerinde jáne adam ótpeıtin jerlerde 25 márte ózdiginen qar kóshkini boldy. Onyń jalpy kólemi 35 myń tekshe metr. Abyroı bolǵanda, qurbandar men zardap shekkender joq.
