Almaty taýlarynda morenalyq kólderdi baqylaý úshin 7 gıdrobeket qoıyldy

ALMATY. QazAqparat - Sel júrý qaýpi bar kezeńniń bastalýy men joǵary temperatýranyń bolýyna baılanysty morenalyq kólderdi baqylaý jáne monıtorıng jasaý úshin Almaty taýlarynda Qazseldenqorǵaýdyń 7 bıik taýly maýsymdyq gıdrobeketi qoıyldy, dep habarlaıdy QazAqparat tilshisi.

Almaty qalalyq TJD-nyń málimetinshe, Almaty taýlarynda sel júrý qaýpi bar kezeńde barlyǵy 19 beket jumys isteıtin bolady, onyń 9-y jyl boıy jumys isteýde.
«Almaty qalasynyń mańynda 51 morenalyq kól bar, jaz mezgilinde olardyń ishindegi 6 asa qaýipti kólde bosatý jumystary júrgiziletin bolady. Qazirgi tańda morenalyq kólderdiń tolýy baıqalýda, biraq olardaǵy sý deńgeıi shektik belgilerge jetken joq, kóldiń salalary baıqalmaıdy. Kólderdi sýdan bosatý jáne evakýatsııalyq arnalardy tereńdetý, qosymsha sıfondy qubyrlardy ornatý jáne montajdaý boıynsha aldyn alý jumystaryn 20 maýsymnan keıin bastaý josparlanýda», - dep habarlady TJD-da.

Sonymen qatar, sel júrý qaýpin táýlik boıy baqylaý - naqty ýaqyt rejıminde gıdrometeorologııalyq jaǵdaıdy qashyqtyqtan baqylaýǵa múmkindik beretin sel qaýpi Monıtorınginiń avtomattandyrylǵan júıesiniń (MAJ) 31 stantsııasynyń kómegimen júzege asyrylady.
«Jalpy, maýsym - qyrkúıek aılary aralyǵynda qaladaǵy sel júrý qaýpi Almaty qalasynyń tótenshe jaǵdaılar departamenti men «Qazseldenqorǵaý» mekemesiniń erekshe baqylaýynda bolady», - dep habarlady vedomstvonyń baspasóz qyzmeti.
Almaty qalalyq TJD sondaı-aq Almaty taýlarynda 7 gıdrobeketti qoıýda Almaty ákimdigi avıatsııalyq qoldaý kórsetkenin málim etti.