Almaty taýlarynda kóshkin qaýpi bar - TJD
ALMATY. QazAqparat – Almatyǵa jaqyn ornalasqan taýly qyrattarda laı kóshkini júrýi múmkin. Osyǵan baılanysty tótenshe jaǵdaılar departamenti turǵyndardy saq bolýǵa shaqyrdy, dep habarlaıdy QazAqparat tilshisi.
«Almatyda 2-5 sáýir aralyǵynda jaýyn-shashyn bolady. Osy kezeńde taý bókterinde kóshkin júrý qaýpi bar. Sondyqtan qalamyzdyń taýly aımaqtarynda turatyn turǵyndardan sý jelileri men káriz shuńqyrlardy paıdalaný kezinde saq bolýdy, sý jelilerinde aqaý paıda bolǵan jaǵdaıda sýdy óshirip, ony qalpyna keltirý úshin tıisti shara qabyldaýdy suraımyz. Taýdaǵy ýchaskelerde jer jumystarynan bas tartý qajet»,– dep habarlaıdy Almaty qalalyq TJD baspasóz qyzmeti.
Biz buǵan deıin Almatyda bıyl sý basý qaýpimen kúreske 6 481 adam jumyldyrylatynyn habarlaǵan bolatynbyz.
