Almaty taýlarynda erli-zaıyptylar adasyp ketti
NUR-SULTAN. QazAqparat – Úlken Almaty shyńynda adasqan erli-zaıyptylar qutqaryldy. Bul jaıynda QR ІІM Tótenshe jaǵdaılar komıtetinen málim etti, dep habarlaıdy QazAqparat.
Vedomstvo málimetinshe, 8 qyrkúıek kúni tańerteń jas jubaılar Úlken Almaty shyńy aýdanynda taýǵa joryqqa shyǵyp, keshke qaraı adasyp ketken. Keshki saǵat 21-00-de QR ІІM TJK Respýblıkalyq jedel qutqarý otrıadynyń kezekshiligine erli-zaıyptylardyń baǵdardan adasyp, taýǵa joǵary shyǵyp bara jatqandyǵy týraly habarlama túsken. Olar naqty qaı jerde ekenderin bilmegen. Týrısterdiń qıyn jaǵdaıǵa tap bolǵandyǵy týraly aqparat túskennen keıin QR ІІM TJK Respýblıkalyq jedel qutqarý otrıadynyń jedel qutqarý toby iz kesetin ıtpen birge oqıǵa ornynan attanǵan. Úlken Almaty kóli aýdanyna ketken 10 qutqarýshy men 1 iz kesetin ıt jaıaý izdeý-qutqarý jumysyna kirisken.
«Birneshe shaǵyn topqa bólingen qutqarýshylar tóńirekti súzip shyǵýdy bastady. 9 qyrkúıek kúni tańerteńgi saǵat 05-34-te qutqarýshylar 2 800 metr bıiktikten otbasyn tapty. Ekeýi de medıtsınalyq kómekti qajetsindi. Qyz taıǵanaq tastarmen órmelep kele jatqanda saýsaqtaryn aýyrtyp alǵan. Ekeýine de salqyn tıgen. Sebebi kıimderi taýly aýa raıyna saı emes. Qutqarýshylar alǵashqy medıtsınalyq kómek kórsetip, tómenge túsirdi. Sodan keıin zardap shekkenderdi QR ІІM TJK Apattyq medıtsına ortalyǵynyń brıgadasyna tabystady. Al olar týrısterdi 12 qalalyq aýrýhanaǵa jetkizdi», - delingen vedomstvo aqparatynda.
