Almaty taýlarynda eki boıjetken adasyp ketti
ALMATY. QazAqparat - Almaty taýlarynyń Fýrmanov shyńy mańaıynda eki boıjetken adasyp ketti, dep habarlaıdy QazAqparat tilshisi.
«2 sáýirde 13:55-te Almaty qalasy Qutqarý qyzmetine 1992 jáne 2002 jylǵy eki boıjetkenniń taýda adasyp ketip, qaıtar joldy tappaı qalǵany týraly habar tústi», - dep habarlady Almaty qutqarý qyzmetinen.
Boıjetkender tańerteń taýǵa serýendeýge shyǵyp, Fýrmanov shyńy mańaıyndaǵy Kimasar ańǵaryna ketip qalǵan. Kúndiz aýa raıy bir mezette ózgerip, olar qaıtpaqshy bolǵan. Alaıda, qalyń tumannan qaıtar joldy tappaı qalǵan.
«Qutqarýshylar ekıpajy olardy izdeýge bardy. Joǵalyp ketken boıjetkender tabyldy. Qutqarýshylar olarǵa jyly kıimder berip, Qutqarý qyzmetiniń bólimine alyp kelgen. Ol jerde qyzdardy týystary kútip aldy. Іzdeý-qutqarý operatsııasyna 1 tehnıka, 5 qutqarýshy, 1 júrgizýshi tartyldy», - dep atap ótti vedomstvodan.
Eske salaıyq, Almaty taýlarynda qar kóshkini qaýpi joǵary bolyp tur. Budan buryn Іle Alataýynyń baýraıynda reseılik eki snoýbordıst adasyp ketken edi. Qýanyshqa oraı, olar din aman tabyldy.
Avtor: Elaman Turysbekov
