Almaty taýlarynda blokpostar qoıyldy

ALMATY. QazAqparat- Almaty taýlarynda qar kóshkini júrý qaýpi saqtalady. Osyǵan baılanysty blokpostar qoıyldy, dep habarlaıdy QazAqparat tilshisi.

«Adam ómirine qaýipti aımaqtarǵa, ıaǵnı «Kosmostantsııa» avtojolyndaǵy Aıýsaı bógetinen joǵary jáne «Shymbulaq - Tuıyqsý muzdyǵy» tasjolyndaǵy Edelveıs kóshkin jınaý aýdanynda blokpostar ornatyldy. Kóshkin qaýpi kezeńiniń basynan beri adamdar ótpeıtin aýmaqtarda jalpy kólemi 490 myń tekshe metrden asatyn 110 qar kóshkini boldy»,- dep habarlady Almaty qalalyq tótenshe jaǵdaılar departamentiniń baspasóz qyzmeti.

Sonymen qatar qar kóshkininiń 20-dan astam profılaktıkalyq túsýi júrgizildi, jarylǵysh ádispen 50 myń tekshe metrden astam qar massasy túsirildi.

TJD qala turǵyndary men qonaqtaryn taýǵa barýdan bas tartýǵa, aýa raıynyń jaǵdaıyn baqylaýǵa, qar kóshkinin týdyrýy múmkin tik qarly betkeılerge shyqpaýǵa, tótenshe jaǵdaılardy boldyrmaý maqsatynda barlyq qaýipsizdik sharalaryn saqtaýǵa shaqyrdy.