Almaty taýlarynda áli de órt qaýpi saqtalyp otyr
ALMATY. QazAqparat - Almatydaǵy Іle Alataý parkinde eki aıdan beri eń joǵarǵy órt qaýiptiliginiń deńgeıi - besinshi klass bekitilgen, dep habarlaıdy QazAqparat tilshisi qalalyq TJD baspasóz qyzmetine silteme jasap.
Bıyl naýryzdan bastap Almatyda órt-sóndirý bólimsheleri 892 ret dala órtin sóndirýge shyqqan.
Olardyń 336 jaǵdaıynda qurǵaq shóptiń janýy bolsa, qalǵan jaǵdaıda qýraǵan aǵash pen qoqystyń tutanýynan bolǵan.
Osyndaı tótenshe jaǵdaılardan órt jaqyndaǵy turǵyn úılerge, ǵımarattar men qurylystarǵa, sonymen qatar Almaty aýmaǵynyń irgesindegi taý-orman tóńiregine jaıylý qaýpi bar.
«Bıyl naýryzda Medeý aýdanynyń «Dýman» yqsham aýdanynda 10 ga aýmaqta qýraǵan aǵash otqa orandy. 1 tamyzda ot Alataý aýdanyndaǵy Saq Qorǵanynyń bes gektar aýmaǵyn sharpydy. Alataý jáne Medeý aýdandarynda bıyl qurǵaq shóp jıi janyp jatyr. Órt bólimsheleriniń jedel áreketteriniń arqasynda jaqyn mańdaǵy aýla qurylystaryna órttiń jaıylýyn aldyn alýǵa múmkindik boldy», - dedi Almaty TJD basqarma bastyǵynyń orynbasary Aıdos Núsipbaev.
Qalalyq TJD qurǵaq shópti jaǵý kezinde órt qaýipsizdiginiń erejelerin BAQ, áńgimelesý, broshıýralar taratý arqyly júrgizip jatyr.
Órt qaýipti kezeń bastalǵaly beri TJD qyzmetkerleri jergilikti polıtseı qyzmetkerlerimen, ákimdikpen, qoryqshylarmen birge úzdiksiz taý-orman telimderinde patrýldik kezekshilik júrgizip, 7 myńnan astam jadynama men nusqaýlyqtar taratyldy.
Mamandardyń aıtýynsha, dala órtinen shirýdiń tabıǵı protsesi buzylyp, topyraqtyń qunarlyǵy azaıady. Órt kezinde jándikter, sonyń ishinde ósimdikterdi tozańdatqyshtar, topyraqtyń paıdaly mıkroaǵzalary janyp ketedi. Shóp qatty shóp órtengen bolǵan kezde ottan shópte nemese topyraq ústinde ómir súretin barlyq sútqorektiler óledi nemese tunshyǵyp qalady.
Osyǵan baılanysty Almaty qalasynyń Tótenshe jaǵdaılar departamenti taý-orman tóńiregindegi órt qaýipsizdiginiń erejelerin saqtaýǵa, tıisti emes oryndarda ot jaqpaýǵa shaqyrady. Jeke sektor turǵyndaryna - aýmaqty ýaqtyly qurǵaq shóp pen qoqystan tazartýǵa keńes beredi. Al kishi jáne orta bıznes nysandarynyń, jappaı adam jınalatyn nysandardyń jetekshilerine - órt qaýipsizdiginiń sáıkes deńgeıin qamtamasyz etýge shaqyrady.
