Almaty taýlarynda adasyp ketken týrıster qutqaryldy
ALMATY. QazAqparat – Respýblıkalyq jedel-qutqarý jasaǵy Aıýsaı shatqalynda adasyp ketken úsh týrısti qutqardy, dep habarlaıdy QazAqparat tilshisi.
29 mamyr túngi saǵat 01.06-da respýblıkalyq jedel-qutqarý jasaǵynyń kezekshi bólimine, Aıýsaı shatqalynda er adam joǵalyp ketkeni týraly Almaty tótenshe jaǵdaılar departamentinen habarlama kelip tústi.
Belgili bolǵanyndaı, úsh adamnan turatyn týrıster toby Aıýsaı shatqalyna ketken. Kesh túskenshe týrıster úılerine oralmaǵan. Olardyń týystary Almaty qalalyq TJD-ǵa habarlasyp, kómek suraǵan.
Oqıǵa ornyna jeke quramnyń 7 adamy bar jedel top, onyń ishinde 1 kınologııalyq esep izdestirý-qutqarý jumystaryna shyqty.
Saǵat 03.10-da TJM qyzmetkerleri Aıýsaı shatqalyna kelip, izdeýge kiristi. Qutqarýshylar 2 topqa bólindi: birinshisi Kosmostantsııa aımaǵynan izdeýdi bastady, al ekinshisi Prohodnoe shatqalynan ótti.
«Joǵalǵan týrıster Aıýsaı shatqalyndaǵy ekinshi sarqyramanyń ústinen tabyldy. Eshqaısysyna medıtsınalyq kómek qajet bolmaǵan. Nátıjesinde úsh adam, 1993 jyly týǵan er adam jáne Reseıdiń eki azamaty - 1990 jyly týǵan áıel jáne 1980 jyly týǵan er adam qutqaryldy», - dep habarlady Respýblıkalyq jedel-qutqarý jasaǵynyń baspasóz qyzmeti.
Buǵan deıin Almaty taýlarynda joǵalyp ketken Aýstralııa azamatynyń denesin Aıýsaı shatqalynan tabylǵany týraly jazǵan bolatynbyz.
