Almaty taýlarynda adasyp ketken 4 týrıst qutqaryldy
ALMATY. QazAqparat - Almaty taýlarynda adasyp ketken tórt týrıst qutqaryldy, dep habarlaıdy QazAqparat tilshisi.
Qalalyq qutqarý qyzmetine 2 naýryz kúni saǵat 17: 30-da TJD jedel kezekshisi, «Kókjaılaý» shatqalynda 4 adam joǵalyp ketti degen aqparat berdi.
Oqıǵa ornyna Almaty qalasy qutqarý qyzmetinen quramynda 8 adam, izdeý ıtimen birge 1 kınolog jáne respýblıkalyq jedel qutqarý jasaǵynan 15 qutqarýshy, izdestirý ıtimen bir kınolog jumyldyrylady.
Qutqarý jumysy aıasynda uıaly baılanys operatorlarynyń qol jetimdi aımaǵynda bolǵan sátte týrıster baılanysqa shyǵyp, bári jaqsy ekenin jáne kólbeý baǵytta júretin jol tapqanyn aıtady.
«Alaıda táýliktiń qarańǵy ýaqyty men soqpaq boıymen qıyn qar men muzdyń túsýi, týrısterdiń jaraqat alýyna ákelýi múmkin ekenin eskere otyryp, qutqarýshylar 4 adamnan turatyn, 109 qyzmetiniń bir tobyn kezdesýge jiberip, olardy qaýipsiz jerge shyǵaryp salýǵa sheshim qabyldanady. Qutqarýshylar teńiz deńgeıinen 2050 metr bıiktikte «Prosveşenets» shıpajaıy aımaǵynda adasqandarmen kezdesip, barlyǵynyń densaýlyǵyn baǵalap, olardy bulaq janynda kútip turǵan kólikke deıin shyǵaryp saldy» delingen Almaty qalalyq qutqarý qyzmeti taratqan habarlamada.
Almaty qalasynyń qutqarýshylary qala turǵyndary men megapolıs qonaqtaryna taýda qaýipsizdiktiń tehnıkasyn árdaıym saqtaýdy eskertip, taýǵa kóterilip, keri túsetin ýaqytty aldyn ala josparlaýyn suraıdy.
