Almaty taýlarynda 7 adam qutqaryldy
ASTANA. QazAqparat - Úlken Almaty shyńynda Respýblıkalyq jedel qutqarý jasaǵynyń sarbazdary 7 adamdy qutqardy, dep habarlaıdy QazAqparat QR ІІM Tótenshe jaǵdaılar komıtetiniń baspasóz qyzmetine silteme jasap.
«31 tamyz kúni Respýblıkalyq jedel qutqarý jasaǵynyń jedel qyzmetine túngi saǵat 02-00-ler shamasynda jas jigit telefon shalyp, dostarynyń Úlken Almaty shyńynda júrgenin jáne olardyń baılanysqa shyqpaı jatqanan aıtyp, habar bergen. Atalmysh azamat dostaryn izdeýge ózi shyqqaly jatqanyn da aıtqan. Qutqarýshylar jas jigitke tań atqansha kúte turyp, tań atqan soń ózderimen birge jolǵa shyǵýǵa keńes berdi. Basqasha bolmaıtyn da edi, óıtkeni sol kúni túnde qoıý tuman túsken bolatyn jáne ol jaǵdaıdy odan beter ýshyqtyryp jiberýi múmkin edi»,-delingen baspasóz habarlamasynda.
Tańǵy saǵat 5:20-lar shamasynda qutqarý jasaǵynyń ókilderi joǵalǵan adamdar bolýy yqtımal Prohodnoe shatqalyna keledi. Onda telefon shalǵan jigitpen jolyǵyp, joǵalǵandardy izdestirý úshin Kosmostantsııa baǵytyna qaraı jolǵa shyǵady. Saǵat 11-00-der kezinde izdeý jumystaryna taǵy qosymsha topty jumyldarý jóninde sheshim qabyldanady. Olar Aıý-saı shatqalyna qaraı jol tartady.
Oqıǵa ornyna jetken ekinshi top ta izdeý jumystaryna kirisedi. Shamamen eki saǵattan soń ekinshi izdeýshi top joǵalǵandardy Aıý-saı shatqalyndaǵy sarqyramanyń mańynan tabady. Bul kezde týrısterdiń densaýlyq jaǵdaılary ortasha bolatyn. Oqıǵa ornyna birinshi top músheleri de kelip jetip, eki top birigip alpınıstik qurylǵylardy paıdalanyp, týrısterdi shetinen tómen túsire bastaıdy.
Abyroı bolǵanda qutqarý operatsııasy sátti ótip, zardap shekken azamattar kólik júretin alańǵa deıin jetkizildi. Osylaısha 7 adam qutqarylyp, olardyń bireýine medıtsınalyq járdem kórsetildi.
