Almaty taýlarynda 4 týrıst joǵalyp ketti

ALMATY. QazAqparat – Qutqarýshylar Almaty taýlarynda joǵalyp ketken 4 týrısti izdep tapty, dep habarlaıdy QazAqparat.

«4 maýsym saǵat 19:05-te TJM Respýblıkalyq jedel-qutqarý jasaǵynyń (RJQJ) kezekshi-dıspetcherlik bólimine Medeý aýdanyndaǵy taýlarda 4 týrıst joǵalyp ketti degen habarlama tústi. Týrıster Kók jaılaý – Kúmbel shyńy baǵytymen júrgen. Keri qaıtar jolda Gorelnık shatqalyna qaraı shyǵyp, jolda adasyp ketken. Týrıster telefonmen baılanysta bolyp, geolokatsııa derekterin jibere aldy.

Saǵat 20:00-de 6 adamnan turatyn RJQJ jedel toby, onyń ishinde bir kınologııalyq eseptop Gorelnık shatqalyna týrısterdi izdeýge shyqty. Saǵat 22:55-te TJM qutqarýshylary zardap shekkenderdi taýyp aldy. Qýanyshqa oraı týrıster medıtsınalyq kómekke muqtaj bolǵan joq», - delingen Tótenshe jaǵdaılar mınıstrliginiń málimetinde.

Osy oraıda, qutqarýshylar serýendeý erejelerin eske salady: «Taýǵa shyqpas buryn baǵytyńyzdy muqııat zertteńiz, jalǵyz júrmeńiz, joldastaryńyzdy tanys emes ortada jalǵyz tastamańyz. Baǵyttyń negizgi bóligin kúnniń birinshi jartysynda júrip ótýge tyrysyńyz, baǵyttan alshaqtap, ózge joldarǵa (soqpaq) shyqpańyz, joldy qysqartpańyz».

Kómekke muqtaj bolǵan jaǵdaıda 112 nemese 8(727) 372-15-60 («QR TJM RJQJ» MM kezekshi-dıspetcherlik bólimi) nómirlerine qońyraý shalýǵa bolady.