«Almaty-Tashkent» poıyzy aptasyna 3 ret qatynaıtyn bolady

ASTANA. QazAqparat - Búgin Astanada «Qazaqstan temir joly» UK» «Jolaýshylar tasymaly» AQ pen «Ózbekstan temir joldary» AQ ókilderi kezdesti. Kezdesý barysynda temir jol kóligimen jolaýshylardy tasymaldaý salasyndaǵy yntymaqtastyqtyń ózekti máseleleri talqylandy, dep habarlaıdy QazAqparat.

«Jolaýshylar tasymaly» AQ baspasóz qyzmetiniń málimetinshe, taraptar №1/2 «Almaty-Tashkent» poıyzynyń qatynaý jıiligin ulǵaıtýǵa kelisken. Atap aıtqanda, 18 naýryzdan bastap atalǵan poıyz buǵan deıin aptasyna eki ret qatynasa, endi úsh ret qatynaıtyn bolady.

Uly Jibek jolyn jańǵyrtý jáne týrızmdi nasıhattaý aıasynda «Úrimji-Almaty» poıyzynyń baǵdaryn jazǵy ýaqytta «Tashkent-Passajırskaıa» stansasyna deıin uzartý múmkinshiligi de qarastyryldy.

«Qazaqstan taraby 2018/2019 jyldarǵa arnalǵan poıyz qozǵalysynyń jańa kestesinde «Tashkent-Máskeý» jáne «Máskeý-Samarqand-Termez» qosymsha poıyzdaryn shyǵarýǵa qoldaý bildirdi. Sonymen qatar taraptar elektrondy jol júrý qujattaryn damytý boıynsha ekijaqty jumys tobyn qurýǵa ýaǵdalasty», - delingen kompanııa taratqan aqparatta.