Almaty tártip saqshylary qalta urylarynyń izine túsip, urlaý ádisterin zerttegen
ALMATY. 16 qyrkúıek. QazAqparat /Ádilet Musahaev/ - Almaty tártip saqshylary qalta urylarynyń izine túsip, urlaý ádisterin zerttegen. Olardyń úsheýi qylmystyq tájirıbege baı ekendigi anyqtaldy, dep málimdedi qalalyq ІІD-niń baspasóz qyzmeti.
Jedel ýákilder qalta urylarynyń izine túsý arqyly olardyń urlaý ádisterin, qylmystyń izin tez arada jasyrý tásilderin muqııat zerttegen. Jedel ýákilder mundaı urylar, negizinen adamdar kóp shoǵyrlanatyn jerlerde áreket etetinin jasyrmaıdy.
«Dálirek aıtsaq, olar - qoǵamdyq kólik aıaldamalary men avtobýstarda, bazarlar, tipti arnaıy mamandandyrylǵan kúzet qyzmeti bar iri saýda úılerinde de kezdesip jatady. Negizinen, saýda úılerinde áreket etetin qalta urylarynyń basym kópshiligi órt kezinde qarastyrylǵan shyǵý joldary sekildi túrli múmkindikterdi paıdalanyp, iz jasyryp ketedi. Mundaı qylmyskerlerdiń bet perdesin ashý úshin bizdiń bólimsheniń qyzmetkerlerimen arnaıy operatsııalar men josparlar talqylanyp, ony óz ýaqytynda iske asyrýdyń nátıjesinde urylardy kóbinese qylmys ústinde qolǵa túsirýge múmkindik týady»,- dep urlyq túriniń ózindik ózgeshelikterin tarqata aıtty Almaty qalasynyń ІІD Krımınaldy polıtsııa Basqarmasy múliktik qylmystardy ashý bóliminiń bastyǵy Arsen Baımýhanbetov.
Jýyrda ashylǵan tórt páter urlyǵynyń ekeýin áshkereleý oqıǵa bolǵan orynǵa jaqyn mańda júrgen polıtsııanyń ýchaskelik ýákilderiniń enshisine tıgen.
