Almaty-Talǵar jolynda 50 jastaǵy áıeldi kólik qaǵyp, mert boldy

TALDYQORǴAN. QazAqparat - Almaty oblysynda 28 jastaǵy Talǵar aýdanynyń turǵyny 50 jastaǵy jaıaý júrginshini qaǵyp, mert qyldy degen kúdikpen ustaldy, - dep habarlaıdy QazAqparat tilshisi.

Almaty oblystyq Polıtsııa departamenti baspasóz qyzmetiniń málimetinshe, 6 maýsym kúni «Subaru Impreza» kóligin tizgindegen júrgizýshi jaıaý júrginshini qaǵyp ketken. Jábirlenýshi alǵan jaraqatynyń saldarynan oqıǵa ornynda mert bolǵan.

«Almaty-Talǵar jolynyń 12-shi shaqyrymynda 50 jastaǵy áıel adamdy kólik qaǵyp, mert boldy. Mashınany 28 jastaǵy Talǵar aýdanynyń turǵyny tizgindegen. Aldyn ala boljam boıynsha, jaıaý júrginshi júrýge bolmaıtyn jerden ótken. Qazir saraptama taǵaıyndalyp, QR QK 345 babynyń 3-shi tarmaǵyna sáıkes tergeý júrip jatyr. Kólik aıyp turaǵyna qoıyldy»,- delingen atalǵan vedomstvonyń baspasóz qyzmeti taratqan habarlamada.