Almaty-Taldyqorǵan jolyndaǵy sý shaıǵan eńis qalpyna keltirildi
ASTANA. QazAqparat - Sý tasqyny kezeńinde kún saıynǵy joldy baqylaý barysynda «Qazavtojol» AQ-nyń almatylyq fılıalynyń mamandary men «Qazavtojol» RMK uıymynyń qyzmetkerleri 26 naýryzda joldyń 224 shaqyrymynda eńisti sý shaıyp ketkenin anyqtady.
Oǵan qardyń kúrt erýi men jaýǵan jańbyr sebep bolǵan.
Bul qozǵalys qaýipsizdigine qaýip ákelmeıdi. Jol qozǵalysyn shekteý, jyldamdyqty tómendetý sharalary engizilgen joq. Joldyń bul ýchaskesi 2015 jyly «Qulager» JShS merdigeri jóndegennen keıin paıdalanýǵa berilgen.
Qazirgi ýaqytta «Qazavtojol» RMK men «Qulager» JShS merdigerleriniń kúshteri sý shaıǵan eńisti qalpyna keltirý jumystaryn tolyqtaı aıaqtady.
Almaty oblysy sý tasý qaýpi basym óńir bolyp tabylady. Sondyqtan jol qyzmetteri táýlik boıy qadaǵalaý rejimine kóshken.
Óńirde oblys ákimi orynbasarynyń tóraǵalyǵymen jedel shtab jumys isteıdi. Qazirgi ýaqytta ol jeke sý shaıǵan oryndardy tekserýde. Shtab jumysy tabıǵı sıpattaǵy tótenshe jaǵdaılardyń aldyn alýǵa, joıýǵa, qaýipsizdiktiń qajetti deńgeıin qamtamasyz etýge, adam shyǵyny men materıaldyq zalaldy boldyrmaýǵa baǵyttalǵan.
