Almaty-Taldyqorǵan tasjolynyń boıynda qyzmet kórsetý kesheni ashyldy
Ondaǵy málimetterge qaraǵanda, bul eldegi kólik ınfraqurylymyn jaqsartýǵa jáne osy saladaǵy qyzmet kórsetý deńgeıin álemdik standarttarǵa jaqyndatýǵa múmkindik beretin josparly 35 keshenniń alǵashqysy.
Qazaqstanda teńdesi joq jol boıyndaǵy keshen aýdany eki gektardan asatyn jer ýchaskesinde ornalasqan. Onyń aýmaǵynda 14 avtokólikke jáne 2 elektromobılge arnalǵan janarmaı beketi, sondaı-aq júk kólikterine arnalǵan turaq bar. Ǵımarattyń aýdany 1000 sharshy metr. Saıahatshylar úshin ashana, jeńil taǵamdar men kóptegen kafeler bar. Budan bólek, keshende namaz oqýǵa arnalǵan namazhana da bar. COMPASS Comfort kesheni múgedekterge arnalǵan sanıtarlyq aımaqtardy qosa, kóporyndyq dárethanalarmen jáne dýsh bólmelerimen jabdyqtalǵan.
Keshenniń ereksheligi - onyń aýmaǵynda saıahatshylarǵa arnalǵan qyzmetterdiń tolyq spektri usynylady. Avtokólikke janarmaı quıý men jaıly dárethanalardan bastap, tamaq jáne gıgıena ónimderin, avtokólik taýarlary men jolda qajet bolatyn keshendi taǵamdardy satýǵa deıin usynylady. Keshenniń aýmaǵynda qonaqtar shamamen 40-tan 60 mınýtqa deıin bolady dep boljanýda. Osy ýaqytta jaıly jaǵdaıda tynyǵyp, jańa kúshpen jolǵa shyǵa alady.
Byltyr Qazaqstandaǵy janarmaı quıý beketteriniń (JQB), gaz quıý beketteriniń (GQB) jáne avtomobıl gazyn quıý kompressorlyq stantsııasynyń (AGQKS) jalpy sany 5296 birlikke jetti. Bul 2018 jylmen salystyrǵanda 4,8% artyq. Alaıda, olardyń qatarynda avtomobıl saıahatshylaryna sapaly qyzmetterdiń tolyq spektrin usynatyn úlken keshender joq. Sondyqtan COMPASS Comfort jol boıyndaǵy kesheniniń ashylýy osy salanyń damýyndaǵy ózindik jańalyq bolyp tabylady.
Qazaqstan Respýblıkasynyń Prezıdenti Qasym-Jomart Toqaevtyń Qazaqstan Respýblıkasynda jol boıyndaǵy servıstik jelini damytý tapsyrmasyna sáıkes Indýstrııa jáne ınfraqurylymdy damytý mınıstrligi, «QazAvtoJol» UK» AQ jáne «Compass» jelilik janarmaı quıý stantsııalary kompanııasy arasynda jol boıyndaǵy qyzmetti damytýdaǵy yntymaqtastyq pen ózara is-qımyl týraly kelisimge qol qoıyldy. Onyń aıasynda 2025 jylǵa deıin respýblıkalyq mańyzy bar avtojoldardyń boıynda 35 zamanaýı keshen turǵyzý kózdelgen. Atalǵan nysandarda janarmaı quıý beketteri, júk kólikteri men avtobýstarǵa arnalǵan keń turaqtar, kem degende 80 oryndyq fýd-korttar bolmaq. Sondaı-aq, taýarlar men avtomobıl aksessýarlarynyń úlken tańdaýy bolatyn ekspress-dúkender jumys isteıtin bolady. Joba 4 myńnan astam adamdy jumyspen qamtymaq. Al ınvestıtsııalardyń kólemi 30 mlrd teńgeni quraıdy.
«Bul keshenniń ashylýy – elimizde halyqaralyq standarttarǵa jol boıyndaǵy qyzmet ınfraqurylymyn damytý jolyndaǵy mańyzdy qadam. Ázirge elimizdegi alǵashqy kópfýnktsıonaldy keshen bolyp otyr. Keleshekte de qazaqstandyqtarǵa dál osyndaı pishinde, ıaǵnı sapaly jáne jaıly qyzmet kórsetetin nysandar kóbeıedi dep úmittenemiz», - dedi Kusto Group dırektorlar keńesiniń múshesi Orazhan Qaıyrjanuly Qarsybekov.
