Almaty-Taldyqorǵan tasjolyndaǵy oqıǵa jelini shýlatty

TALDYQORǴAN. QazAqparat - Almaty-Taldyqorǵan tasjolynda kólik júrgizýshi jol jıeginde turǵan polıtsııa qyzmetkerlerine shúıligip, «Krıs P» fotoradar keshenin alyp tastaýdy talap etti. Óz áreketin kameraǵa túsirip otyrǵan azamattyń beınejazbasy áleýmettik jelide tarap ketti, dep habarlaıdy QazAqparat tilshisi.

Kólik júrgizýshisiniń aıtýynsha, polıtseıler «Krıs P» qondyrǵysyn Almaty-Taldyqorǵan tas jolynyń Saryózek aýylynan keıingi tusyna ornatqan. Tártip saqshylarynan ózderin tanystyrýdy talap etken ol, fotoradar keshenin ornatý sebebin suraǵan.

«Eger radar jaıdan-jaı turǵan bolsa, onda men ony alyp ketýime bola ma?» dep surady ol. Alaıda, óz áreketin túsindire almaǵan quqyq qorǵaýshylar júrgizýshiniń talabyn oryndap, «Krıs P» quralyn qyzmettik kóliktiń júksalǵyshyna salýǵa májbúr bolǵan.

Bul oqıǵany Almaty oblystyq polıtsııa departamenti óz baqylaýyna aldy. Departamenttiń baspasóz qyzmetiniń ókili Serik Úpıevtiń aıtýynsha, «Krıs P» jyljymaly fotoradar kesheni jol boıyndaǵy ártúrli zańbuzýshylyqtardy anyqtaý maqsatynda qoıylǵan.

«Ol, eń aldymen, avtojoldyń sol ýchaskesindegi jyldamdyq tártibin buzý faktilerin anyqtaıdy. Atalǵan qurylǵynyń tıisti qujattary, ıaǵnı sertıfıkattary bar», - deıdi baspasóz qyzmetiniń ókili.

Sondaı-aq, Serik Úpıev tártip saqshylary men júrgizýshi arasyndaǵy túsinbestikke qatysty tıisti tekserý jumystary júrip jatqanyn atap ótip, tekserý qorytyndysy boıynsha jaǵdaıǵa quqyqtyq baǵa beriletinin tilge tıek etti.