Almaty-Taldyqorǵan tas jolynyń sapasy mamandardy aıaǵynan tik turǵyzdy
TALDYQORǴAN. QazAqparat - Almaty-Taldyqorǵan tas jolynyń sapasyna júrgizýshiler kúmándanýda. Kúni keshe «Vatsap» jelisi arqyly dabyl qaqqan turǵynnyń beınejazbasy lezde tarap, júrgizýshiler joldyń sapasyna kúmándanyp, mamandardy aıaǵynan tik turǵyzdy, dep habarlaıdy QazAqparat tilshisi.
Beınejazbada «Almaty- Taldyqorǵan tas joly. Jańa jol. Qarańyzdar, aldaǵy ýaqytta jol opyrylady. Júrgizýshiler, óte saq bolyńyzdar. Dabyl qaǵýlaryńyzdy suraımyn!» degen sózder anyq estiledi.
Júrgizýshi dabyl qaqqan jer Almaty-Taldyqorǵan tas jolynyń 224-shi shaqyrymy. Jol jıegin sý shaıǵan. Biraq qozǵalysqa qaýipti emes deıdi mundaǵylar. Osynda jol qurylysy men paıdalanylýyna jaýapty mamandar túgel jınalyp, dúrligýge negiz joq ekenin aıtýda.
«Bizde joba boıynsha jol jıeginiń eni 3,75 metr bolýy kerek. Qazir ózderińizge ólshep kórsetkendeı, bul jerde júrý jolaǵynyń shetinen bastap eseptegende 4,80 metr shyǵyp tur. Joldyń jıegi negizinde 3,75 bolýy kerek. Demek bul bizde eshqandaı qozǵalys qaýipsizdigine kedergi keltirip turǵan joq»,- dedi «QazAvtojol» UK AQ Almaty oblystyq fılıaly dırektorynyń orynbasary Nurhat Aqyltaev.
Sondaı-aq Aqyltaevtyń sózinshe, bul jerde kishkene sýaǵarlardy shaıyp ketken. Merdiger kompanııa óziniń qarajatymen tehnıka jáne 10 adamnan turatyn brıgadasyn alyp kelip, der kezinde qalpyna keltirý jumystaryn júrgizip jatyr.
