Almaty-Taldyqorǵan tas jolyndaǵy oqıǵaǵa baılanysty zańger pikir bildirdi
TALDYQORǴAN. QazAqparat - Almaty-Taldyqorǵan tas jolynda «Krıs P» fotoradar kesheni úshin polıtseılerge talap qoıǵan kólik júrgizýshiniń áreketine oraı zańger Esimbol Mamyrqanov pikir bildirdi, - dep habarlaıdy QazAqparat tilshisi.
«Meniń kózqarasym boıynsha, júrgizýshiniń talaby zańsyz. Sebebi, KRIS-P qurylǵysy ol - jyljymaly. Sondyqtan, onyń qoıylǵandyǵy jóninde belgi ornatý qajet emes. Ol qurylǵy belgili bir jyldamdyq shektelgen jerlerge qoıylady. Al polıtseılerdiń qurylǵyny jınap, júrgizýshige zańdy túrde jaýap bere almaýlary, olardyń quqyqtyq saýattylyǵy tómen bolýynan, jaǵdaı osylaı bolǵan shyǵar»,- dedi zańger Esimbol Mamyrqanov.
Esterińizge sala keteıik, 2 qańtar kúni Almaty-Taldyqorǵan tas jolynda kólik júrgizýshi jol jıeginde turǵan polıtsııa qyzmetkerlerine shúıligip, «Krıs P» fotoradar keshenin alyp tastaýdy talap etti. Vıdeo avtorynyń sózinshe, «Krıs P» qurylǵysyn qoıǵanda onyń ornatylǵandyǵy jóninde belgi bolý kerek. Alaıda, óz áreketin túsindire almaǵan quqyq qorǵaýshylar júrgizýshiniń talabyn oryndap, «Krıs P» quralyn qyzmettik kóliktiń júksalǵyshyna salýǵa májbúr boldy. Almaty oblystyq polıtsııa departamenti baspasóz qyzmetiniń málimetinshe, qazir osy vıdeodaǵy jaıtqa baılanysty tekserý júrip jatyr.
«Tártip saqshylary men júrgizýshi arasyndaǵy túsinispeýshilikke qatysty tıisti tekserý jumystary júrip jatyr. Tekserý qorytyndysy boıynsha jaǵdaıǵa quqyqtyq baǵa beriletin bolady», - dedi Almaty oblystyq Polıtsııa departamenti baspasóz qyzmetiniń ókili Serik Úpıev.
