Almaty Superski jobasyn júzege asyratyn halyqaralyq kompanııalar anyqtaldy
ASTANA. KAZINFORM – Almaty taý klasterin damytý aıasyndaǵy Almaty Superski jobasy naqty iske asyrý kezeńine ótti. Joba boıynsha negizgi qurylys jáne jobalaý jumystaryn atqaratyn halyqaralyq kompanııalar anyqtaldy.
Premer-mınıstr Oljas Bektenov Kazakh Tourism Development Ltd kompanııasy dırektorlar keńesiniń otyrysyn ótkizip, Almaty taý klasterin damytý jobasynyń júzege asyrylý barysyn qarady.
Jıynda Kazakh Tourism Development Ltd kompanııasynyń bas atqarýshy dırektory Erjan Erkinbaeva Almaty Superski jobasynyń qazirgi jaǵdaıy jóninde baıandama jasady.
– Jobanyń negizgi nysandaryn jobalaý jáne salý máseleleri boıynsha birqatar sheshim qabyldandy. Osylaısha, Almaty Superski jobasy daıyndyq kezeńinen naqty júzege asyrý satysyna ótti, – dep habarlady Úkimettiń baspasóz qyzmeti.
Ashyq konkýrs nátıjesinde 11 aspaly jol salý jobasyn júzege asyrý úshin álemdik jetekshi óndirýshilerdiń biri sanalatyn frantsýzdyq POMA kompanııasy tańdaldy. Kompanııa 1936 jyldan beri jumys isteıdi jáne álemniń 90 elinde 8 myńǵa jýyq jobany iske asyrǵan.
Joba aıasynda 3S júıesindegi gondolaly aspaly joldar, 10 oryndyq gondolaly jeliler men kresloly kótergishter salý josparlanyp otyr.
Sonymen qatar halyqaralyq sáýlet bıýrosy Foster + Partners ázirlegen tujyrymdama negizinde salynatyn nysandardyń aǵash konstrýktsııalaryn jobalaý jáne óndirý úshin kanadalyq StructureCraft kompanııasy tartyldy. Al qurylysty daıyndaý jáne jobany keshendi basqarý jumystary amerıkalyq Hill International kompanııasyna júkteldi.
– Qurylys jumystarynyń barlyq kezeńinde jobalaý sapasyna, qaýipsizdik talaptaryna jáne ekologııalyq jaýapkershiliktiń halyqaralyq standarttaryna qatań baqylaý qamtamasyz etilýi qajet, – dedi Oljas Bektenov.
Úkimet málimetinshe, jobany júzege asyrý Almaty taý klasteriniń týrıstik áleýetin arttyryp, óńir ekonomıkasyna mýltıplıkatıvtik áser beredi. Sonymen qatar qala turǵyndary men týrıster úshin zamanaýı ári qaýipsiz ınfraqurylym qalyptastyrýǵa múmkindik jasaıdy.
Qazirgi ýaqytta bekitilgen kestege sáıkes qurylys jumystary bastalyp ketken.
Almaty Superski taý shańǵysy kýrortyn paıdalanýǵa berý 2028 jyldyń jeltoqsanyna josparlanǵan.
Aıta keteıik, Qazaqstan, Gonkong jáne Qytaı kompanııalary 42 kelisimge qol qoıdy.
