Almaty sý qubyrlarynda birneshe iri apat oryn aldy
ALMATY. QazAqparat - Búgin Almatyda sý qubyrlarynda birneshe iri apat oryn aldy. Bul týraly «Almaty sý» MKK baspasóz hatshysy Serik Shaǵyrov habarlady.
Osyǵan baılanysty 70-ke tarta úı sýsyz qalǵan bolatyn. Qazir atalǵan úılerge sý berý qalpyna keltirildi.
«Eń iri apat Aqsaı shaǵynaýdanynda boldy. Munda 15 kópqabatty úı, 3,4 shaǵynaýdandarda 3 úı, Bostandyq aýdanynda 6 úı, Túrksib aýdanynda 60 jer úı sýsyz qaldy. Qazir bulardyń bárine sý berildi. 14 mamyrda Saın kóshesiniń boıyndaǵy jerasty jolynyń astynda júrgizilgen sý qubyrlary ortalyq sý júıesine qosylady. Soǵan baılanysty 14 mamyrda tańǵy saǵat 9-dan keshki 8-ge deıin Orbıta, Mamyr, Teplıchnyı shaǵynaýdandarynda sý berý toqtatylady», - dedi Serik Shaǵyrov.
Onyń aıtýynsha, qaladaǵy qubyrlardyń tozý kórsetkishi 69 paıyzdy qurap otyr. 2009 jyldan beri 54 shaqyrym sý qubyry almastyrylǵan eken. Al bıyl 9 shaqyrym sý qubyryn aýystyrý josparlanyp otyr.
«2008 jyly sý qubyrlarynda 3854 apat oryn alsa, 2013 jyly 2220 apat tirkelgen. Bes jylda bul kórsetkish 1500 jaǵdaıǵa azaıǵan. Mundaı kórsetkish sý qysymyn retteıtin jańa qurylǵylardy ornatýǵa, qubyrlardyń sapasynyń artýyna baılanysty bolyp otyr. Qubyrdyń jarylýy kóbine sý qysymynyń ózgerýine baılanysty bolady. Sondaı-aq, 1990 jyldary qalada ıesiz qalǵan qubyrlar kóp edi. Qazir olardyń bári memleket balansyna alynyp, qalpyna keltirilýde», - dep túıindedi S.Shaǵyrov.
