Almaty stýdentteri jazǵy demalystaryn tıimdi ótkizýde
Y. Maýsymnyń 25-i. QazAqparat /Erbol Turymbetov/ - Almatydaǵy ál-Farabı atyndaǵy Qazaq ulttyq ýnıversıtetiniń stýdenttik qurylys jasaqtary iske kiristi.
Keshe QazUÝ qalashyǵynda ótken SQJ quryltaıynda ýnıversıtet rektory Baqytjan Jumaǵulov stýdent-jumysshylarǵa saltanatty túrde Stýdenttik qurylys jasaǵy medaldaryn tabys etti. Endi 14 fakýltettiń stýdenttik jasaqtary oqý bastalǵanǵa deıin aılyq jalaqymen jumys isteıdi.
«Stýdenttik qurylys jasaqtary ýnıversıtet aýmaǵyn kógaldandyrýǵa, oqý ǵımarattarynyń qurylysyna jáne qalalyq saıabaqtardyń árlenýine atsalysatyn bolady. Al demalys kúnderi olarǵa bı keshteri, kontsertter men oıyn-saýyq uıymdastyrylyp turady», deıdi SQJ jetekshisi Jumaǵalı Esenbek.
Stýdentterdiń jazǵy eńbek semestrin alǵash ret 1959 jyly Máskeý memlekettik ýnıversıtetiniń komsomoldary uıymdastyrǵan bolatyn. Odaq kóleminde qalyptasa bastaǵan bul jasaq Kırov atyndaǵy Qazaq memlekettik ýnıversıtetinde 1963 jyly quryldy. Táýelsizdik jyldary turalap qalǵan stýdenttik jasaq jumystary ál-Farabı atyndaǵy Qazaq ulttyq ýnıversıtetinde 2008 jyldyń jazynda qaıta jandandy.
«Stýdenttik qurylys jasaǵyna bıyl ekinshi ret qatysyp otyrmyn. Jazǵy demalysymda stýdent qurdastarymmen birge eńbek etý men úshin qyzyqty. Osy qyzmetim arqyly óz ýnıversıtetim men qalanyń gúldenýine úles qosqym keledi», deıdi fılologııa fakýlteti stýdenttik jasaǵynyń komandıri Qýanysh Kárim.
