Almaty stýdentteri Farıza Ońǵarsynovanyń jyrlaryn oqýdan jarysty

ALMATY. QazAqparat - Dara qoltańbasymen, ózindik bolmys-bitimimen qazaq poezııasyna sony lep ákelgen aqyn, ult ádebıetiniń kórnekti ókili, memleket jáne qoǵam qaıratkeri Farıza Ońǵarsynovanyń 80 jyldyǵyna oraı Almatyda ádebı baıqaý ótti, dep habarlaıdy QazAqparat tilshisi.

Tuńǵysh ret uıymdastyrylǵan saıysta Almaty qalasyndaǵy joǵary oqý oryndarynyń stýdentteri baq synady. Qatysýshylar aldyn ala onlaın daýys berý arqyly iriktelgen. Arnaıy beınebaıan túsirgender aqtyq kezeńge joldama alǵan.

Saıys úsh baǵyt boıynsha ótti. «Jyryń qaldy janymnyń ushqynyndaı» kezeńinde jastar Farıza Ońǵarsynovanyń óleńderin naqyshyna keltirip oryndady. «Áýelegen ásem án» týrynda aqynnyń sózderine jazylǵan mýzykalyq týyndylar áýelese, «Jyr jazamyn júrekpen» atty kezeńde júrekjardy arnaý jyrlar usynyldy.

Qatysýshylardyń ónerin jazýshy, jýrnalıst Beıbit Sarybaı, aktrısa Nurgúl Myńǵatova baǵalady.

«Ótkenge kóz salsaq, qazaq ádebıetiniń tarıhynda ómirin óleńge arnaǵan aqyn áıelder az emes. Olardyń qatarynda Marııa Hakimjanova, Zııash Qalaýova, Marfýǵa Aıtqojına, Aqushtap Baqtygereeva, Qanıpa Buǵybaeva, Kúlásh Ahmetova esimderin erekshe atasaq bolady. Ótken ǵasyrdyń 60-70-jyldary – kóziqaraqty kópshilik «poezııa padıshasy» dep áspettegen Farıza Ońǵarsynovany osy tizimniń kósh basynda, aldyńǵy sapynda turǵan ult ádebıetinde ózindik órnegi bar názikjandylardyń biri hám biregeıi dep atasaq bolady. Talaı urpaq Farızanyń shyǵarmashylyǵyna shyn súısinse, Kúlásh pen Qanıpanyń, Aqushtaptyń lırıkasyn jatqa oqydy», – dedi uıymdastyrýshylar.

Baıqaýdyń «Jyryń qaldy janymnyń ushqynyndaı» atty baǵyty boıynsha bas júldeni Abylaı han atyndaǵy Qazaq halyqaralyq qatynastar jáne álem tilderi ýnıversıtetiniń stýdenti Janar Jeksenova ıelendi. Birinshi orynǵa Qazaq ulttyq qyzdar pedagogıkalyq ýnıversıtetiniń stýdenti Nuraı Aıtbaeva, ekinshi jáne úshinshi oryndarǵa ál-Farabı atyndaǵy Qazaq ulttyq ýnıversıtetiniń stýdentteri Qumarbek Nurken men Saǵynysh Baltabaı ıe boldy.

«Áýelegen ásem án» kezeńinde Qazaq ulttyq qyzdar pedagogıkalyq ýnıversıtetiniń stýdenti Alýa Tumarbaıdyń juldyzy janyp, birinshi oryndy qanjyǵalady. Ekinshi oryndy ál-Farabı atyndaǵy Qazaq ulttyq ýnıversıtetiniń stýdentteri Janáli Bekzathan men Maǵjan Datqa ózara bólisse, úshinshi oryndy Qyzdar ýnıversıtetiniń stýdenti Aqerke Jahanqyzy oljalady.

«Jyr jazamyn júrekpen» baǵytynda Abylaı han atyndaǵy Qazaq halyqaralyq qatynastar jáne álem tilderi ýnıversıtetiniń stýdenti Dıana Іzbasar júzden júırik shyqty. Bul baǵytta Qyzdar ýnıversıtetiniń stýdenti Aqtolqyn Jolaýshybaı birinshi oryndy, ál-Farabı atyndaǵy Qazaq ulttyq ýnıversıtetiniń stýdenti Qanat Erbolat ekinshi oryndy jáne osy oqý ornynyń stýdenti Baýyrjan Asqaruly úshinshi oryndy enshiledi.

Jeńimpazdar «Alǵys hatpen», arnaıy dıplomdarmen jáne baǵaly syılyqtarmen marapattaldy.

Qazaq ulttyq qyzdar pedagogıkalyq ýnıversıtetinde ótken baıqaýǵa «Aq qaýyrsyn» jastar shyǵarmashylyq klýby uıytqy boldy.