Almaty stansasyn aınalyp ótetin temirjol salynady
ASTANA. QazAqparat - Almaty stansasyn aınalyp ótetin temirjol jelisiniń qurylys jobasyna konkýrs jarııalanady. Bul týraly búgin Úkimet otyrysynda QR Investıtsııalar jáne damý mınıstri Jeńis Qasymbek aıtty, dep habarlaıdy QazAqparat tilshisi.
Mınıstrdiń aıtýynsha, memlekettik-jekeshelik áriptestik aıasynda uzyndyǵy 73,7 shaqyrymdy quraıtyn Almaty stansasyn aınalyp ótetin temir jol jelisiniń qurylysy bastalady.
«Almaty stansasyn aınalyp ótetin temirjol jelisiniń qurylys jobasy boıynsha osy aıdyń sońynda eń jaqsy tehnıkalyq usynystardy anyqtaýǵa konkýrs jarııalanady. Jalpy joba Almaty stansasyn 40 paıyzǵa jeńildetýge jáne sol arqyly tranzıtpen júretin júkterdi tasymaldaý merzimin 2 táýlikke qysqartýǵa múmkindik beredi. Memlekettik-jekeshelik áriptestik is-áreketiniń merzimi - 30 jyl», - dedi Jeńis Qasymbek.
Mınıstr «Almaty-Qorǵas» avtomobıl joly ýchaskesindegi «Nur joly» avtomobıl ótkizý pýnktiniń ınfraqurylymyn salý jumysy da memlekettik-jekeshelik seriktestik aıasynda júrgizilgendigin aıtty.
«27-shi qyrkúıekte «Nur joly» ótkizý pýnkti resmı iske qosyldy. Eski «Qorǵas» ótkizý pýnktimen salystyrǵanda Qazaqstan men Qytaı arasyndaǵy «Nur jolynyń» ótkizý múmkindigi 10 esege ulǵaıdy. ıAǵnı, táýligine 2500 avtokólik quraldaryna deıin jetedi. Qazirgi ýaqytta jeke seriktes 2026 jylǵa deıin paıdalanýǵa jumysyna kiristi», - dedi ol.
