Almaty sotyndaǵy jańa jobalar isti qaraýdy jyldamdatady
ALMATY. QazAqparat - Almatyda 4 aıdan beri Medeý aýdandyq sotynda «Túngi sot» jáne «Taraptardy mámilege keltirý» pılottyq jobalary júzege asyrylyp jatyr. Bul isti qaraýdy jeńildete túsedi, dep habarlaıdy QazAqparat tilshisi.
Pılottyq joba jumysty qysqartyp ǵana qoımaı, sýdıalar júgin jeńildetpek. Bul týraly qalalyq sot alańynda ótken pılottyq jobalardy iske asyrý jóninde ótken baspasóz máslıhatyndaaıtyldy.
Jańa jobalardy júzege asyrý barysynda 210 aryz-talaptyń 123-sy qaralǵan. Onyń ishinde nekeni buzý, múlikti bólý, qaryzdy óndirý, jalaqy, tutynýshylar quqyǵyn qorǵaý, jer daýy kezdesedi. Atalǵan ister boıynsha sotqa 1 mln 77 myń teńge kóleminde memlekettik baj qaıtaryldy.
«Jobany iske asyrý úshin Medeý aýdandyq sotyn tańdaldy. Sebebi bul jerde qaladaǵy qylmystyq isterdiń kóp bóligi osynda qaralady. Pılottyq baǵdarlama aıasynda taraptardy ymyralastyrý - jaǵdaıǵa baǵa berip, bolashaqty boljaı otyryp máseleni tarazyǵa salýǵa, ýaqytty únemdep 5 kún ishinde sheshim shyǵarýǵa septigin tıgizedi. Eger eki jaqtyń biri ymyralastyrý sharasyn qatysýdan bas tartsa nemese 5 jumys kúni ótkenshe sotqa kelmese onda is burynǵy tártippen qaraýǵa sotqa jiberiledi», - dedi Medeý aýdany sotynyń tóraǵasy Áset Boranbaev.
Aıta ketý kerek, Medeý aýdandyq soty joba aıasynda ymyralastyrý sharasyna qatysýshylarǵa saýalnama júrgizdi. Suraqqa jaýap berýshiler medıtatsııany jańǵyrtý jaıly pikirlerimen bólisken. Nátıjesinde 11 mamyr men 25 qyrkúıek aralyǵynda 123 anketa kelip túsken. Olardyń bári bir aýyzdan jobaǵa qoldaý bildirgen.
«Túngi sot - pılottyq joba. Ol keshki saǵat 18.30-dan 21.30-ǵa deıin jumys isteıdi. Joba arqasynda sot qaýlysynyń oryndaý merzimi qysqartylyp, saqtandyrý tólemin alý 15 kúnge qysqardy. Baǵdarlama boıynsha azamattardyń isterin qaraý úshin olar ýaqytynda sotqa kelýge mindetti. Іsti keshki ýaqytqa aýystyrý úshin eki jaqtyń da kelisimi kerek», - dedi Almaty mamandandyrylǵan aýdanaralyq ákimshilik sotynyń ákimshilik sotynyń tóraǵasy Baqytjan Tájihanov.
