Almaty soty Muhtar Ábilıazovtiń sybaılasyna úkim shyǵardy

ALMATY. QazAqparat – Bıylǵy 15 qazanda Almaty qalasy Medeý aýdandyq № 2 sotynda Muhtar Ábilıazovtiń qylmystyq qoǵamdastyqtaǵy taǵy bir sybaılasy, Birikken Arab Ámirlikterinen ekstradıtsııalanǵan Ibragımov Rústem Shamılevıchke qatysty aıyptaý úkimi shyqty, dep habarlaıdy QazAqparat.

QR Sybaılas jemqorlyqqa qarsy is-qımyl agenttiginen málim etkendeı, R.Ibragımov 5 jylǵa bas bostandyǵynan aıyryldy. Sondaı-aq oǵan 3 jylǵa bank uıymdarynda kásibı qyzmetpen aınalysýǵa tyıym salyndy.

«Ibragımov «BTA Banki «AQ №2 Korporatıvtik bıznesti nesıelik taldaý departamentiniń dırektory, nesıeleý jónindegi basqarýshy dırektor laýazymdaryn atqardy jáne bas banktiń nesıelik komıtetiniń múshesi boldy.

Ol qylmystyq qoǵamdastyqtyń basshysy Muhtar Ábilıazovtiń baqylaýyndaǵy kompanııalarǵa nesıe berý týraly zańsyz oń sheshimder qabyldaýǵa járdemdesti.

Bastapqyda Ibragımov óz kinásin moıyndap, tergeýge kómektesti jáne eshqaıda ketpeý jáne durys minez-qulyq týraly qolhat berdi, biraq qylmystyq qoǵamdastyq basshylarynyń yqpalymen jasyrynýǵa sheshim qabyldady.

Nátıjesinde, 2010 jyldan bastap Ibragımov qamaýǵa alý bultartpaý sharasymen halyqaralyq izdeýde boldy. Ol Qyrǵyzstan azamatynyń jalǵan qujattarymen jasyrynyp júrdi», - delingen agenttik aqparatynda.

Anyqtalǵandaı, Ibragımov 2017 jylǵy jeltoqsanda BAÁ quqyq qorǵaý organdaryna ustalǵannan keıin, ol ózin Qyrǵyzstan azamaty - Rýstam Muhtarov retinde tanystyrýdy jalǵastyryp, Qazaqstannyń rezıdenttigin joqqa shyǵardy.

Tergeý organy 2 jyldan astam ýaqyt boıy Rýstam Muhtarovtyń atyna jazylǵan qujattardyń jalǵan ekenin, onyń Qazaqstan azamaty bolyp tabylatynyn dáleldep, ony Rústem Ibragımov retinde taný týraly sharalar qabyldanǵan.

«Ol úshin Qazaqstan, Qyrǵyzstan jáne BAÁ quqyq qorǵaý organdary jumyldyryldy.

Nátıjesinde, BAÁ Ádilet mınıstrligi qazaqstandyq tarap usynǵan barlyq dálelderdi zerdelep, Ibragımovtyń qujattary men aıǵaqtarynyń jalǵandyǵyna kóz jetkizdi jáne ony qylmystyq jaýapkershilikke tartý úshin Qazaqstan Respýblıkasyna berý týraly sheshim qabyldady.

Bıyl 4 naýryzda Ibragımov Qazaqstanǵa qaıtaryldy.

Ábilıazovtiń ózin qosa alǵanda, halyqaralyq izdeýde júrgen 16 kúdiktige qatysty sotqa deıingi tergeý jalǵasýda.

Іzdeýdegi birneshe adam tikeleı nemese ózderiniń jaqyn týystary arqyly Qazaqstanǵa óz erkimen oralýǵa daıyn ekendikterin málimdedi. Olardyń kelýine járdemdesý jáne buryn tańdalǵan jolyn kesý sharalaryn jeńildetý boıynsha barlyq qajetti sharalar qabyldanýda.

Shet memleketterdiń quzyretti organdarymen ózara is-qımyl tek kúdikti tulǵalardy izdestirý, ustaý jáne ekstradıtsııalaý boıynsha ǵana júzege asyrylmaıdy.

Osy rette, qazaqstandyq tarap bastamashylyq etken halyqaralyq tergeý tapsyrmalarynyń negizinde Eýropalyq Odaqtyń birqatar elderi men basqa ıýrısdıktsııalardyń quqyq qorǵaý organdary Ábilıazov pen onyń sybaılastaryna qarsy óz tergeýlerin bastady.

Osy óndirister aıasynda tyǵyz halyqaralyq-quqyqtyq yntymaqtastyq júzege asyrylýda», - dedi agenttikten.