Almaty-Shymkent tasjolyndaǵy jol apatynan zardap shekkenderdiń sany naqtylandy
TARAZ. QazAqparat - Jambyl oblysynyń polıtsııasy Almaty-Shymkent tasjolynyń 534 shaqyrymynda bolǵan jol-kólik apaty boıynsha tekserý júrgizip jatyr, dep habarlaıdy «QazAqparat» HAA tilshisi Jambyl oblystyq ІІD baspasóz qyzmetine silteme jasap.
Eske salaıyq, 31 qazanda saǵat 03.10-da Jambyl aýdany Aısha bıbi aýylynyń mańynda 31 jolaýshy mingen avtobýs aýdarylyp qalǵan edi. 20 jastaǵy avtobýs jolaýshysy qaza tapsa, qalǵan jolaýshylar túrli jaraqat aldy.
Jambyl oblystyq ІІD baspasóz qyzmeti habarlaǵandaı, «Van HOL» jolaýshylar avtobýsynda 49 jolaýshy men eki júrgizýshi bolǵan.
«Avtobýs júrgizýshisi róldi basqara almaı, kólik aýdarylyp qaldy. Qazir oqıǵanyń mán-jaıy anyqtalyp jatyr. Atalmysh fakti sotqa deıingi tergeýdiń biryńǵaı tizilimine QR QK 345-baby 3-bólimi boıynsha tirkeldi. Qajetti saraptamalar taǵaıyndaldy», - dep túsindirdi quqyq qorǵaý vedomstvosyndaǵylar.
Oblystyq densaýlyq saqtaý basqarmasynyń deregi boıynsha, úsh zardap shegýshige oqıǵa ornynda medıtsınalyq kómek kórsetilgen. Qazirgi tańda №1 qalalyq aýrýhanaǵa 28 adam jetkizilip, olardyń segizi aýrýhanaǵa jatqyzylǵan, al 19 adamǵa kómek kórsetilip, úılerine jiberilgen. Bir bala oblystyq balalar aýrýhanasyna jetkizilgen.
