«Almaty - Shý» ýchaskesinde poıyzdardyń jol júrisi 3 saǵatqa qysqardy

ASTANA. QazAqparat - QR Investıtsııalar jáne damý mınıstrliginde «Almaty - Shý» ýchaskesindegi ekinshi joldyń qurylysy boıynsha birinshi iske qosý keshendik jobasynyń 1 jartyjyldyqtaǵy jumys qorytyndylandy. Bul týraly mınıstrliktiń baspasóz qyzmeti habarlady.

Atalmysh temir jol ýchaskesi «Nurly jol» baǵdarlamasyn júzege asyrý aıasynda ótken jyldyń jeltoqsan aıynda iske qosylǵan bolatyn jáne ol ekinshi joldyń 53 shaqyrymyn qamtıdy (joba aıasyndaǵy ekinshi joldyń uzaqtyǵy 112 km).

Osylaısha, birinshi iske qosý keshenin paıdalanýǵa bergen kezden bastap, «Almaty - Shý» temir jol ýchaskesiniń ótkizý múmkindigi 1,5 esege artty (táýligine 45-ten 68 par poıyzǵa deıin).

Atalǵan ýchaske arqyly shamamen 70 mln tonna júk tasymaldanyp, jol júrý ýaqyty 3 saǵatqa qysqardy.

Sonymen birge, bıyl jyldyń sońyna deıin uzaqtyǵy 59 shaqyrym bolatyn ekinshi iske qosý kesheni boıynsha jumystardy aıaqtaý josparlanýda. Qazirgi ýaqytta, mundaǵy jumystarǵa 33 tehnıka men 105 jumysshy jumyldyrylǵan.

«Jobanyń maqsaty - qoldanystaǵy «Almaty - Shý» ýchaskesindegi poıyzdardyń qozǵalysyn uıymdastyrýda ońtústik baǵyttaǵy ýchaskelerdiń ótkizý múmkindigin arttyrý úshin «tar oryndardy» joıý jáne tıisti jerge jetkizilýi tıis júkti tasymaldaý merzimin 2 esege deıin qysqartýǵa baǵyttalǵan», - delingen habarlamada.