Almaty saılaýǵa daıyn - Qala boıynsha saılaý komıssııasynyń tóraǵasy B. Dospanov

  Bul týraly búgin Almatyda BAQ ókilderine qaladaǵy saılaý ýchaskeleriniń daıyndyǵyn tanystyrý maqsatynda ótkizilgen press-týr barysynda Almaty qalasy boıynsha saılaý komıssııasynyń tóraǵasy Baqytjan Dospanov málim etti.

 Onyń aıtýynsha, aldaǵy saılaýdyń barynsha joǵary deńgeıde ótýi úshin barlyq saılaý ýchaskeleri qajetti jabdyqtarmen qamtamasyz etilgen.  "Saılaýǵa mıllıon shaqyrý bıleti daıyndaldy. Qazirgi ýaqytta ol shaqyrý bıletteri aýdandyq ýchaskeler arqyly barlyq úılerge taratyldy. Saılaý kezinde Almaty qalasy boıynsha 470  saılaý ýchaskesi jumys isteıtin bolady. Ony 37 okrýg, 7 aýdandyq jáne 1 qalalyq komıssııa basqarady.   Ýchaskelerde mindetti túrde táýelsiz baıqaýshylar bolady. Elimiz boıynsha 700-den asa baıqaýshy kelse, onyń besten biri  Almatydaǵy saılaýdyń ótkizilý barysyn tekserýge qatysady. Sondaı-aq ár jeti partııadan bir adamnan táýelsiz sarapshylar saılaý jumysyn qadaǵalaıtyn bolady. Almaty qalasy boıynsha saılaýshylardyń sany - 960 myń, biz olardyń saılaýǵa 70-75 paıyzy keledi degen senimdemiz",-dedi ol.

 Birneshe saılaý ýchaskelerinde kemshilikter de anyqtalǵan. "Keıbir ýchaskelerde tapsyrys kesh jasalǵandyqtan daýys berý jáshigi daıyn bolmaı shyqty, ol qajetti zattar búgin-erteń daıyn bolady. Bul ekinshi taraptaǵy másele. Eń bastysy, saılaýshylardyń tizimi daıyn. Sondyqtan Almaty qalasynyń saılaý ýchaskeleri saılaýdy ótkizýge saqadaı saı daıyn",- dep atap ótti Baqytjan Dospanov. 

 Onyń aıtýynsha, bıyl Almaty qalasy boıynsha 202 adam máslıhat depýtattyǵyna usynys bergen. "Bul úlken kórsetkish. Aldyńǵy (2007 jylǵy) saılaýda 165 úmitker óz ótinishin bergen bolatyn.  Onda 35 adam ár túrli sebeptermen saılaýǵa túse almasa, bıyl 92 adam saılaý dodasynan alynyp tastaldy.  Eń basty sebep, salyqtyq deklaratsııa. Bıylǵy saılaýda depýtattyqqa ózin-ózi usynǵandar men partııa atynan túsken úmitkerlerdiń sany 50/50 paıyz boldy",-dedi   Almaty qalasy boıynsha saılaý komıssııasynyń tóraǵasy Baqytjan Dospanov.