Almaty saılaý komıssııasy ashylǵan bıýlletenderge qatysty túsinik berdi
«Ýchaskelik komıssııanyń is-áreketi zań aıasynda - olar daýys berý úshin alǵan bıýlletenderdi qaıta sanaýǵa mindetti. Bizde kandıdatýralaryn alyp tastaǵan nemese zań buzýshylyqtarǵa baılanysty keri qaıtarylǵan kandıdattardyń sany aıtarlyqtaı kóp. «Qazaqstan Respýblıkasyndaǵy saılaý týraly» Zańǵa sáıkes, Qazaqstan Respýblıkasy Ortalyq saılaý komıssııasynyń 2018 jylǵy 19 qyrkúıektegi №16/20 qaýlysynda bekitilgendeı, kandıdattyqty alyp tastaý, kandıdatty usyný týraly sheshimniń kúshin joıý, kandıdattardy, partııalyq tizimderdi tirkeý týraly sheshimniń kúshin joıý týraly ister boıynsha saılaý bıýlletenderin ózgertý qaǵıdalary bekitildi, ýchaskelik saılaý komıssııalary bul jumysty daýys berý kúnine deıin júrgizýge mindetti», - dedi Asel Qalyqova.
Onyń aıtýynsha, daýys berý kúni bıýlletende qalǵan kandıdattar ǵana bolýy kerek. Bul erejede bıýlletenderden shyǵarylatyn kandıdattardyń aty-jóni qalaı alynyp tastalatyny naqty sıpattalǵan. Almaty aýmaqtyq saılaý komıssııa tóraǵasynyń sózinshe, 16 naýryzǵa deıin keıbir kandıdattar tirkeýden alynyp, saılaýǵa qatyspaıtyn boldy. «Alaıda, osy kezge deıin myńdaǵan bıýlletender basylyp shyqty. Sondyqtan da bul kúnderi ýchaskelik saılaý komıssııalarynyń músheleri daýys berý kúnine daıyndaý úshin bıýlletenderden olardyń málimetterin syzyp tastaýǵa májbúr. Máselen, úshinshi saılaý okrýgi boıynsha Májilis depýtattyǵyna 38 úmitker bolsa, qazir olardyń sany - 30. Bıýlletenderden segiz adamnyń esimin alyp tastaý kerek. Besinshi okrýgte 34 bolǵan, qazir 24 qaldy. Olar zań aıasynda jumys isteıdi, degenmen BAQ-ta durys aqparat berilmedi, bul keıbir kandıdattardyń senim bildirilgen adamdarynyń saılaý ýchaskelerine kelýine túrtki boldy»,- deıdi spıker. Aıgúl Qalyqova ýchaskelik saılaý komıssııalarynyń jumysyna kedergi jasamaýǵa shaqyrdy. Olar búgin jáne erteńnen keshiktirmeı árbir bıýlletennen shyǵyp qalǵan kandıdattardy syzyp tastaýǵa mindetti.
Sondaı-aq Almaty ASK tóraıymy saılaý ýchaskelerinde partııalyq plakattar ilýli turǵany, biraq bir mandatty kandıdattar týraly aqparat joq degen aqparatqa túsinik berdi. «Barlyq aqparattyq plakattar daıyndalǵan. Erteń, 18 naýryz kúni túske deıin olar ýchaskelik komıssııalardyń aqparattyq stendterine ornalastyrylady. Zańǵa sáıkes, bul aqparattyq plakattar belgili bir ýaqytqa ilinýi tıis degen talaptar joq. Bul talap ásirese saılaý kúnine qatysty»,- dep túsindirdi ol.
