Almaty saıabaqtaryndaǵy kásipkerlerdiń birqatary salyq uıymdaryna tirkelmegen
ALMATY. QazAqparat - Almaty qalasynyń memlekettik kirister departamentiniń ókilderi shaǵyn kásip ıeleriniń salyq mindetterin atqarýyn qadaǵalaý maqsatynda saıabaqtardy aralady, dep habarlaıdy QazAqparat tilshisi.
Olar qala saıabaqtarynda saýda jasap jatqan kásipkerlerdiń salymshy retinde zańdy tirkeýde turǵandyǵyn tekserip, qoldanysta bolýy tıis baqylaý apparattary men POS-termınaldaryn túgendegen.
«Ortalyq demalys saıabaǵy men Kóktóbede zań buzýshy kásipkerler kóp, sol sebepti tekserý jumystaryn biz tap osy oryndardan bastadyq. Tekserý júrgizilgen alǵashqy kúni-aq 6 kásipkerdiń zańdy túrde salyq uıymyna tirkelmegeni anyqtaldy. Budan ózge 13 saýda ornynda baqylaý apparaty bolmaı shyǵyp, sondaı-aq POS -termınaldarynsyz jumys isteýdiń 10 faktisin tirkedik», - dep habarlaıdy memllekettik kirister departamentiniń baspasóz qyzmeti.
Barlyq quqyqbuzýshy kásipkerge jiberilgen qateliktiń ornyn toltyrý qajettigi eskertilip, ákimshilik jaýapkershilik baǵytynda túsindirý jumystary júrgizildi.
Shaǵyn kásip sýbektilerin tirkeý merzimin ótkizip alǵan jaǵdaıda 15 AEK túrinde aıyppul salynyp, ákimshilik jaýapkershilik qarastyrylady. Sondaı-aq arnaıy tekseris sharasy kezinde salymshy retinde tirkelmegeni anyqtalǵan kásipkerlerdiń taýary men ákimshilik quqyqbuzýshylyq quralyn tárkileý talaby qarastyrylǵan.
Araılym Joldasbaeva
