Almaty saıabaqtarynda Wi-Fi paıda bolady
ALMATY. QazAqparat - Almaty bıligi ekologııalyq problemalardy ǵaryshtyq tehnologııalar arqyly sheshpek. Búgin qala əkimdiginde «Qazaqstan ǵarysh sapary» UQ AQ pen «Almaty aqparattyq júıeler ortalyǵy» JShS, «Almaty damý ortalyǵy» JShS-ylary ózara yntymaqtastyq týraly memorandýmǵa qol qoıdy.
Ózara yntymaqtastyq aıasynda taraptar jerdi qashyqtan zondtaý jəne joǵary dəldiktegi spýtnıktik navıgatsııa úshin ǵaryshtyq júıelerdi paıdalanýdy qolǵa almaq.
Osylaısha «Qazaqstan ǵarysh sapary» UQ AQ tıisti maqsatta paıdalanylmaı jatqan jerlerdi baqylap, nysandardyń qurylysyn, avtokólikterdiń qordalanýyn, qaladaǵy ekologııalyq məselelerdi qadaǵalaýdy qolǵa alady.
Sondaı-aq, əkimdik «Capital Bank Kazakhstan» AQ-pen kelisimge keldi. Ýaǵdalastyqqa səıkes bank Almatyda júzege asyrylatyn ınnovatsııalyq jobalarǵa 1 mlrd teńge bólip, saıabaqtar men gúlzarlarda 20 Wi-Fi núktesin ornatýdy qolǵa alady.
Qala əkimi Baýyrjan Baıbek ınnovatsııalyq jobalardyń alatyn ornyn atap ótti.
«Memleket basshysy Almatynyń damýyna erekshe kóńil bólip otyr. Saıabaqtar men demalys oryndarynyń abattandyrylýy qalamyzdyń týrıstik potentsıalyn odan əri arttyrmaq. Almatyǵa sapary barysynda Elbasy tek qarjy jəne ekonomıkalyq ortalyq bolyp qoımaı, ınnovatsııalyq tehnologııalardyń ortalyǵy bolýy tıis degen bolatyn», - dedi B.Baıbek.
Óz sózinde qala əkimi bıznes qaýymdastyqtyń əleýmettik jaýapkershiligin tilge tıek etti. Onyń aıtýynsha, osy ýaqytqa deıin Almaty əkimdigi 9 bankpen memorandýmǵa qol qoıǵan. Ózara yntymaqtastyq aıasynda balabaqsha, mektep, emhanalar salynyp jatyr.
