Almaty saıabaǵynyń birinde kenege uqsas jándikter órip júr
ALMATY. QazAqparat - Almaty saıabaǵynyń birinde kenege uqsas jándikter qaptap júrgeni anyqtaldy, dep habarlaıdy QazAqparat tilshisi.
Áleýmettik jelide taraǵan aqparatqa súıensek, Almaty turǵyny keshki serýen kezinde saıabaqtaǵy oryndyqtardyń birinen kenege uqsas jándikterdi sýretke túsirip alǵan.
«Keshe keshkisin balalarymmen Tımırıazev boıymen serýendedik. Botanıkalyq saıabaqtaǵy oryndyqta jybyrlap júrgen kenege uqsas jándikterdi kórdik. Abaı bolyńyzdar»,-delingen onyń jazbasynda.
Osy keleńsiz jaǵdaıǵa oraı, qoǵamdyq densaýlyq saqtaý departamentine habarlasqan edik.
«Botanıkalyq saıabaq jeke qurylymǵa jatady. Bul jerdi jaýapty ıeler óz qarjysyna óńdeýi kerek. Al qalǵan ákimdik qaramaǵyndaǵy saıabaqtardy memlekettik tapsyryspen sáýir aıynda tazaladyq. Botanıkalyq saıabaq týraly anyqtadyq. Olar osy jaqyn arada zııankesterdi joıý jumysyn júrgizetin bolady»,-dedi qoǵamdyq densaýlyq saqtaý departamentiniń basshysy Aızat Moldaǵasymova.
Araılym Joldasbaı
