Almaty-Saryózek jolynda júrgizýshini pyshaqtap, kóligin minip ketken kúdikti ustaldy
TALDYQORǴAN. QazAqparat - Almaty oblysynda kólik júrgizýshisine pyshaqtaǵan kúdikti ustaldy, dep habarlaıdy QazAqparat tilshisi.
Almaty oblystyq Polıtsııa departamenti baspasóz qyzmetiniń málimetinshe, 14 mamyr kúni «Almaty-Saryózek» avtojolynyń 159-shaqyrymynda Qarashoqy aýylynyń tusynda Jambyl aýdanynyń turǵynyna qaraqshylyq shabýyl jasalǵan. Júrgizýshini birneshe ret pyshaqtaǵan kúdikti onyń avtokóligin minip, qashyp ketken. Tártip saqshylary bir táýlik ishinde qylmysqa qatysy bar adamdy anyqtap, ustady.
«Almaty qalasynyń 1998 jyly týǵan turǵyny kúdikke ilindi. Eń aldymen zardap shegýshiniń kóligi Saryózek kentiniń mańynda aldyńǵy dóńgelegi jarylǵan kúıde tabyldy. Birneshe saǵat ótken soń qaraqshylyq jasady degen kúdikke ilingen azamat Úshtóbe qalasynda qolǵa tústi. Ol kinásin tolyq moıyndady», - dedi Kerbulaq aýdany Polıtsııa bóliminiń bastyǵy Erbol Aıtqalıev.
Qazirgi ýaqytta adam óltirýge oqtalý deregi boıynsha sotqa deıingi tergeý amaldary júrgizilýde. Tergeý barysynda qylmystyń barlyq mán-jaıy anyqtalatyn bolady. Ustalǵan kúdikti aýdandyq polıtsııanyń ýaqytsha ustaý ızolıatoryna qamaqqa alyndy.
