Almaty «sary» aımaqqa ótti degenmen bosańsýǵa áli erte - dáriger

ALMATY. QazAqparat - Almaty qalalyq №7 klınıkalyq aýrýhananyń emhanasynyń Mobıldik tobynyń jaýapty dárigeri Jánibek Serikbaı QazAqparat tilshisine koronavırýstan emdeýdiń búgingi ádis-tásilderi men revaktsınatsııa jaıly aıtyp berdi.

«Koronavırýspen kúreste tolyqqandy qurastyrylǵan klınıkalyq hattama bar. Sol boıynsha «dáleldi medıtsına» aqparatyn qoldana jáne árbir naýqastyń sımptomyn eskere otyryp, taǵaıyndalatyn dári-dármektermen ınvazıvti jáne ınvazıvti emes ádis-tásilder arqyly kómek kórsetiledi»,- dedi dáriger.

Onyń aıtýynsha, Almatyda qazirgi ýaqytta koronavırýs indetin juqtyrǵandar sany azaıyp keledi.

«Vırýs óte qaýipti, ol mýtatsııaǵa ushyraýy jáne jańa shtamdardyń paıda bolýy ábden múmkin. Sondyqtan sanıtarlyq talaptardy tolyqqandy oryndaǵan durys. Almaty «sary» aımaqqa ótse de, esh bosańsýdyń qajeti joq. Alǵashqy sımptomdar paıda bolǵan jaǵdaıda (jótel, temperatýranyń kóterilýi, bulshyq et aýrýy, bas aýrýy) dereý dárigerge qaralý qajet. Mundaıda aldyn alý sharalaryn oryndaǵan jón. Asqyndyrmaý úshin dáriger jazǵan nusqaýlyqty tolyq oryndaý kerek», - dedi Jánibek Serikbaı.

Revaktsınatsııa jaıly dáriger óz oıyn bylaısha jetkizdi.

«Revaktsınatsııa vaktsınadan keıin ımmýnıtetti kóterý maqsatynda jasalatyn shara. Vırýs túriniń mýtatsııalyq qabiletin eskere otyryp, vırýstyń pandemııalyq dárejedegi aldyn alý sharalarynyń eń negizgi jáne mańyzdy sheshimi dep oılaımyn. Aǵzanyń ózindik ımmýnıteti arqyly vırýsty tolyqqandy jeńý úshin jasalatyn is shara bolyp tabylady. Aıta keteıik, revaktsınatsııany alǵashqy vaktsınanyń tolyq 2 komponentin alǵan soń, 6-9 aıdan keıin alý kerek»,- dedi ol.