«Almaty-Saratov» poıyzynan bıleti joq 6 jolaýshy anyqtaldy

AQTÓBE. QazAqparat - Aqtóbe oblystyq memlekettik qyzmet isteri jáne sybaılas jemqorlyqqa qarsy is-qımyl departamenti oblystyq kóliktik baqylaý ınspektsııasy jáne jelilik polıtsııa bólimi qyzmetkerlerimen birlesip, tekseris júrgizdi. Bul týraly vedomstvonyń baspasóz qyzmetine silteme jasap QazAqparat habarlaıdy.

Reıd alypsatarlar men bıletsiz júrý múmkindikterin joıyp, adamı faktor áserin boldyrmaıtyn bloktar júıesin qurýǵa baǵyttalǵan «Adal jol» jobasy aıasynda uıymdastyryldy.

«Jolaýshylar tasymaly» AQ jolaýshylar poıyzynyń 3 jolserigi ákimshilik jaýapkershilikke tartyldy. QR Ákimshilik quqyq buzýshylyq týraly Kodeksiniń 623-baby 4-tarmaǵyna sáıkes, olardyń árqaısysyna 2,5 AEK mólsherinde aıyppul salyndy, sondaı-aq tıisti qujatsyz 170 kılogramm qosymsha júk tasymaldaǵany anyqtaldy. Qazirgi ýaqytta jolserikterge qatysty shara qabyldaý týraly hat «Jolaýshylar tasymaly» AQ «Ońtústik» aımaqtyq fılıalyna joldanǵan», - deıdi oblystyq memlekettik qyzmet isteri jáne sybaılas jemqorlyqqa qarsy is-qımyl departamentiniń ókili Nurtóre Qaldybaev.

Júrgizilip jatqan reıd turaqty túrde jyl sońyna deıin jalǵasady.