Almaty saqshylary kólikterdiń avtoturaqtar men aıaldamalarda ereje buzýshylyǵyn anyqtaýda
ALMATY. Tamyzdyń 25-i. QazAqparat /Ádilet Musahaev/ - Almatyda 23-25-shi tamyz aralyǵynda Jol qozǵalysy erejeleriniń buzylýyn anyqtaýǵa baǵyttalǵan «Avtoturaq» aldyn alý sharasy ótip jatyr,
dep habarlaıdy QazAqparat Almaty ІІB-nyń baspasóz qyzmetine silteme jasap.
Shara barysynda ásirese kólik turaqtary men aıaldamalar basa nazarǵa alynýda.
Jol polıtsııasy ótkizilip otyrǵan bul shara Almatydaǵy kólikterdiń jolda júrý erejelerin saqtap, júrgizýshiniń tártibi men mádenıetin artyratynyna senimdi. Eń bastysy - atalmysh shara nátıjesinde avtoturaqtarda oryn alatyn apattardy joıýǵa múmkindik týýda.
«Júrgizýshiler kóbinde toqtaý erejeleri men kólik turaqtarynda tártip saqtaı bermeıdi. Munyń arty kútpegen apattar men jol boıyndaǵy keptelisterge ákelip soǵady. Sonymen qatar júrgizýshiler qoǵamdyq kólikter toqtaıtyn aıaldamaǵa da kólikterin qoıyp, erejelerdi dóreki buzady. Sondyqtan tártip saqshylary turaqtar men qoǵamdyq kólikter toqtaıtyn aıaldamalardy qatań tekserý ústinde", deıdi Almaty qalasy ІІB-nyń Jol polıtsııasy basqarmasynyń bastyǵy polkovnık Arman Sarbasov.
JPB-nyń ınspektorlary joǵaryda aıtylǵan máseleler boıynsha ereje buzǵan júrgizýshilerdi ákimshilik jaýapqa tartýda. Ákimshilik jaýapqa tartylǵanyna bir aı tolmaı qaıta jol júrý erejesin buzyp, jol polıtsııasynyń qolyna túsip jatqandar da bar.
"Atalmysh shara turaqty túrde júrgizilip otyratyn bolady. Mundaı aldyn alý jumystary jol qozǵalysynyń qaýipsizdigin nyǵaıtyp, apatty jaǵdaıdy tómendetedi. Jyl basynan beri Almaty JPB-nyń ınspektorlary jol erejesin buzǵan 5 myńǵa jýyq oqıǵany tirkedi", dep atap ótti A.Sarbasov.
