Almaty saqshylary adam óltirý qylmysyn izin sýytpaı ashty
ALMATY. Qańtardyń 25-i. QazAqparat / Ádilet Musahaev / - «Býran» sholǵynshy polıtseıleri adam óltirgen jergilikti turǵyndy ustady,
dep habarlaıdy QazAqparat ІІD baspasóz qyzmetine silteme jasap.
22 qańtar kúni keshkisin polıtseılerge Súıinbaı dańǵyly boıyndaǵy bir úıdiń páterinde oń jaq bileginen pyshaq jaraqatyn alyp, qastandyqpen óltirilgen jigittiń máıiti jatyr degen aqparat kelgen.
Birneshe mınýttan keıin qylmys bolǵan jerde sholǵynshy polıtseı ekıpajy men Jetisý aýdanynyń IIB jedel tergeý toby jumys isteýge kiristi. Saqshylar marqumnyń kim ekenin anyqtaý barysynda onyń mańǵystaýlyq 1976 jyly týǵan B. degen azamat ekenin bildi. Sarapshylardyń qorytyndysy boıynsha jigit kóp qan joǵaltýdyń nátıjesinde qaza tapqan. Jergilikti turǵyndardyń aıtýynsha, qaıǵyly oqıǵadan buryn sol páterden aıqaı-shý shyqqan. Erkekter daýys kótere daýlasqan. Sezikti jaıynda maǵlumat alǵan polıtseıler jaqyn mańdy tekserýge kirisedi.
Kóp uzamaı izdestirý jumystary nátıje bere bastaıdy. Qylmys bolǵan jerge jaqyn aýmaqta qolyna, kıimderine qan juqqan sezikti jigit baıqalǵan. Saqshylardy kóre salysymen jigit qasha jóneledi, biraq ol uzaqqa barmady. Onyń jeke zattaryn tekserý barysynda pyshaq tabylǵan. Qylmyskerdiń aıtýynsha, sol keshte olar araq iship, aralarynda daý týyndaıdy, arty tóbeleske ulasady.
Belgili bolǵandaı, quryqtalǵan 22 jasar D. degen azamat buryn qylmystyq jaýapqa tartylmaǵan. Jetisý aýdanynyń ІІB-sy onyń ústinen adam óltirdi degen bap boıynsha qylmystyq is qozǵaldy.
