Almaty revmatologtary Áleýmettik úıdiń turǵyndaryn tekseristen tegin ótkizdi
ALMATY. QazAqparat - Almatyda revmatolog dárigerler áleýmettik kómekke muqtaj jandar turatyn arnaıy Áleýmettik úıge baryp, onyń turǵyndaryn tegin qabyldady, dep habarlaıdy QazAqparat tilshisi.
Kóshpeli tekserý qalalyq Densaýlyq saqtaý basqarmasynyń qoldaýymen ótti.
Eske salsaq, Almatyda arnaıy Áleýmettik úı ashylǵan. Bul - áleýmettik kómekke muqtaj múmkindigi shekteýli jáne qart adamdar turatyn Qazaqstandaǵy jalǵyz úı.
Qalalyq Revmatologııa ortalyǵynyń dárigerleri atalǵan nysan turǵyndaryn óz qaraýyna alǵanyna bıyl ekinshi jyl.
«Revmatologtar nelikten áleýmettik úıdiń turǵyndaryn tańdap otyr? Sebebi munda múmkindigi shekteýli ári qart adamdar turyp jatyr. Olardyń kópshiligi súıek-qańqa aýrýlaryna shaldyqqan. Búgin turǵyndar súıek tyǵyzdyǵyn ólsheıtin osteodensıtometr apparatyna tústi. Byltyrǵy júrgizilgen tekserý nátıjelerine sáıkes, 26 adamnyń ishinde 20 adamda osteoporoz, 5 patsıentte osteopenııa anyqtaldy. Sonymen qatar, dárigerler dıagnozdy anyqtap qana qoımaı, buryn tirkelgen naýqastarǵa em-dom sharasyn jazyp berdi», - dedi qalalyq Densaýlyq saqtaý basqarmasynyń baspasóz qyzmetinen.
Qazirgi tańda Qazaqstanda osteoporoz syrqatynyń keń taralýy dárigerlerdi alańdatyp otyr. Aýrý basynda múlde eshqandaı belgi bermeıdi. Sondyqtan dárigerler der kezinde aýrýdy anyqtaý úshin 50 jastan asqan azamattarǵa densıtometrııa apparatynyń kómegimen tekserilýge keńes beredi.
Osy maqsatta, qalalyq ákimdiktiń bastamasymen qalalyq Revmatologııa ortalyǵynda Osteoporoz ortalyǵy ashyldy. Munda jylyna 100 adam sapala medıtsınalyq kómek ala alady.
