Almaty respýblıkalyq bıýdjetke byltyrǵydan 51 mlrd. teńge artyq qarajat quıdy - ákimdik
ALMATY. QazAqparat - Almatyda birinshi jartyjyldyqta ekonomıkanyń barlyq salasynda ósim baıqaldy, dep habarlaıdy QazAqparat qalalyq ákimdiktiń baspasóz qyzmetine silteme jasaı otyryp.
Qalalyq ákimdik usynǵan málimetke súıensek, megapolıste bul kúnde 171,5 myń shaǵyn jáne orta bıznes sýbektisi jumys isteıdi, bıylǵy jyldyń alǵashqy jartyjyldyǵynda olardyń sany 5 paıyzǵa artqan. Qalada salyq túsimi de molaıǵan. Respýblıkalyq bıýdjetke 645,2 mlrd. teńge túsken, bul ótken jyldyń osy kezeńimen salystyrǵanda 9%-ǵa (51,1 mlrd. teńge) kóp.
Jergilikti bıýdjetke 184,2 mlrd. teńge salyq quıylǵan, bul byltyrǵy jyldyń sáıkes kezeńimen salystyrǵanda 9%-ǵa (15,2 mlrd. teńge) artyq.
«2016 jyly óńirlik jalpy ónim 2,6% nemese 10,3 trln. teńgeni qurady. Ústimizdegi jyldyń 6 aıy ishinde ekonomıkanyń barlyq salalarynda ósim baıqalady: bólshek saýda 6,8%-ǵa, kóterme saýda 0,7%-ǵa, ónerkásip 4,7%-ǵa, qurylys 0,7%-ǵa, baılanys 4,9%-ǵa, aýylsharýashylyǵy 62,8%-ǵa artqan. Turǵyn úı salý 15,6%-ǵa, ınvestıtsııa kólemi 235,7 mlrd. teńgege ósip, 12,2%-ǵa ulǵaıǵan. Inflıatsııa 3,6%-dy, respýblıkada 3,7% quraıdy», delingen habarlamada.
Jalpy, 2017 jylǵy qala bıýdjeti 542,4 mlrd. teńge. Ótken jyly únemdeýdiń arqasynda jergilikti bıýdjet 33 mlrd. teńgege, ıaǵnı 50%-ǵa artty. Ótken jylmen salystyrǵanda joldardy jóndeý men qurylys salýǵa 2,8 ese, al ınjenerlik jelilerge 1,9 ese, abattandyrýǵa 2,7 ese kóp aqsha bólingen.
