Almaty reprodýktology ana bolýǵa daıyndalyp júrgenderge vaktsına alýǵa keńes berdi
ALMATY. QazAqparat - Almaty reprodýktology Saltanat Baıqoshqarova «Almaty» telearnasyna bergen suhbatynda ana bolýǵa daıyndalyp júrgenderge koronavırýsqa qarsy vaktsına alýǵa keńes berdi, dep habarlaıdy QazAqparat tilshisi.
Onyń aıtýynsha, vaktsına qajet, óıtkeni bul anany da, balany da qorǵaıdy.
Saltanat Baıqoshqarova «Probırkadan» shyqqan tuńǵysh qazaqstandyq balanyń avtory jáne Qazaqstandaǵy reprodýktologııanyń negizin qalaýshy. Ol ata-ana bolýǵa daıyndalyp júrgenderge koronavırýsqa qarsy vaktsına alýǵa keńes berdi.
«Eger áıel júktilik kezinde COVID-19 aýrýyn juqtyrsa, qaýipti asqynýlar týyndaıdy», - dedi Saltanat Baıqoshqarova.
Reprodýktologııa men embrıologııa salasyndaǵy tanymal kóshbasshy maman vaktsına áıeldi de, er adamdy da bedeýlikke ákelmeıdi dep sendiredi. Sondaı-aq, maman koronavırýs vaktsınasynan keıin EKO baǵdarlamasynan bas tartý jalǵan ekenin aıtty.
«Koronavırýs vaktsınasynan keıin eshkim EKO-dan bas tartpaıdy. Vaktsınanyń ekinshi dozasyn alyp bir aıdan keıin júktilikti josparlap, EKO baǵdarlamasyna barýǵa bolady», – dedi Saltanat Baıqoshqarova.
Sonymen qatar dáriger vaktsına adamnyń reprodýktıvti júıesine áser etpeıtinin jetkizdi.
«Kerisinshe vaktsına alǵan adamda koronavırýsqa qarsy ımmýnıtet qalyptasady sondyqtan júktilikti josparlaýǵa bolady. Vaktsına erlerdi de, áıelderdi de bedeýlikke ákelmeıdi. Biz naýqastarǵa aldymen vaktsına alýdy, bir-eki aıdan keıin júktilikti josparlaýdy usynamyz», - dedi dáriger.
Onyń aıtýynsha, eger áıel tabıǵı jolmen nemese EKO-men júkti bolyp, aýrý juqtyrsa júktilik kezinde asqynýlar bolady.
«Árıne, qaıǵyly jaǵdaı bolǵanyn qalamaıtynymyz anyq, sondyqtan vaktsına alý mańyzdy», - dedi ol.
