Almaty prokýratýrasy qala ortasyndaǵy tergeý ızolıatorynyń jumysyn toqtatty

ALMATY. QazAqparat - Almaty prokýratýrasy sottalǵan-qamalǵan azamattardyń quqyǵyn qorǵaý maqsatynda qaladaǵy qylmystyq atqarý júıesi organdarynyń jumysynyń zańdylyǵyn tekserdi, dep habarlaıdy QazAqparat tilshisi.

Atap aıtqanda, prokýrorlyq tekserýden soń Seıfýllın-Mámetova kósheleriniń qıylysynda ornalasqan №1 LA-155/18 tergeý ızolıatory jabyldy. Atalǵan ǵımarat ótken ǵasyrdyń 30-jyldarynda salynǵan. Apatty jaǵdaıdaǵy ǵımarattyń týra qalanyń ortasynda turýy da qala turǵyndaryna qolaısyzdyq týǵyzyp otyr.

№18 mekemesinde qamaýdaǵy adamdardy tergeýge shaqyrý tártibi durystaldy. Endi tergeýshiler bul sharalardy tergeý ızolıatorynda júrgize alatyn boldy. Almaty ákimdiginiń qoldaýymen osy oqshaýlaý ornynda front ofıs ashylady. Jańa baqylaý-ótkizý pýnkti jyl sońyna deıin paıdalanýǵa beriledi.

Prokýrorlar kúdiktilerdi qamaýda ustaý ýaqytyn 10-15 táýlikke deıin azaıtýǵa usynys berdi. Sonyń arqasynda kóptegen is sozylmaı, adamdar tarapynan túsetin shaǵymdardyń sany da azaıdy.

Sonymen qatar, advokattardyń ótinishimen kúdiktiler men týystarynyń ońasha kezdesetin kabınetteri de kóbeıdi. Atap aıtqanda, kezdesý kabınetiniń sany 5-ten 18-ge artty. Sondaı-aq, qorǵaýshylar óz qorǵaýyndaǵy azamattarmen senbi kúnderi de kezdese alatyn boldy.

Qala ákimdigi prokýratýranyń usynysyn eskere otyryp, tergeý ızolıatoryna deıingi 3 avtobýs baǵytyna túzetý engizdi. Buryn jolaýshylar tergeý ızolıatoryna deıin 1,5 shaqyrym jaıaý júrip keletin.